പാലക്കാട്: ബൈക്കില് നിന്ന് വലിച്ച് താഴെയിട്ടതിനെ തുടര്ന്ന് ചികിത്സയിലായിരുന്ന യുവാവ് മരിച്ചു. കൊടുമ്പ് സ്വദേശി ഗിരീഷ് ആണ് മരിച്ചത്. 33 വയസായിരുന്നു. വീഴ്ചയില് തലയ്ക്ക് സാരമായി പരിക്കേറ്റ ഗിരീഷ് ഗുരുതര പരുക്കുകളോടെ തൃശൂര് മെഡിക്കല് കോളജ് ആശുപത്രിയില് ചികിത്സയിലായിരുന്നു. കല്ലിങ്കല് ജങ്ഷനില് വ്യാഴാഴ്ച രാത്രിയിലായിരുന്നു സംഭവം.
ബൈക്കില്നിന്ന് വീണ് യുവാവിനു സാരമായി പരുക്കേറ്റത് ആസൂത്രിത അപകടമെന്ന് പൊലീസ് വ്യക്തമാക്കിയിരുന്നു. ബൈക്ക് മറിഞ്ഞുണ്ടായ അപകടമെന്നാണ് ആദ്യം കരുതിയതെങ്കിലും, വ്യക്തിവൈരാഗ്യം കാരണം, മറ്റൊരു ബൈക്കില് സഞ്ചരിക്കുകയായിരുന്ന സുഹൃത്ത് ഗിരീഷിനെ ബോധപൂര്വം കൊലപ്പെടുത്താന് ശ്രമിച്ചതാണെന്നു പൊലീസ് കണ്ടെത്തി.
ഗിരീഷിനെ തള്ളി വീഴ്ത്തിയ തിരുവാലത്തൂര് സ്വദേശി സജു, ബൈക്കോടിച്ചിരുന്ന അക്ഷയ് എന്നിവരെ സൗത്ത് പൊലീസ് അറസ്റ്റു ചെയ്തു. ചന്ദ്രനഗറിലെ ബാറില്നിന്ന് മദ്യപിച്ച ശേഷം വീട്ടിലേക്കു മടങ്ങുംവഴി ആസൂത്രിത അപകടമുണ്ടാക്കി യുവാക്കള് രക്ഷപ്പെടുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ