കോഴിക്കോട്: കോഴിക്കോട് മെഡിക്കല് കോളജിന് സമീപം ആദിവാസി യുവാവിനെ തൂങ്ങിമരിച്ച നിലയില് കണ്ടെത്തിയ സംഭവം ആത്മഹത്യയെന്ന് പോസ്റ്റ്മോര്ട്ടം നടത്തിയ ഡോക്ടര്. ശരീരത്തില് മര്ദനമേറ്റതിന്റെ പാടില്ല. ശരീരത്തിലെ മുറിവുകള് മരത്തില് കയറുമ്പോള് ഉരഞ്ഞുണ്ടായതാണെന്ന് ഫോറന്സിക് സര്ജന് എസിപിക്ക് നല്കിയ മൊഴിയില് പറയുന്നു.
ഭാര്യയുടെ പ്രസവത്തിന് കൂട്ടിരിപ്പുകാരനായി എത്തിയ വയനാട് സ്വദേശി വിശ്വനാഥനെ എട്ടാം തിയതി രാത്രിയാണ് ആശുപത്രിയില്നിന്ന് കാണാതായത്. രണ്ടു ദിവസങ്ങള്ക്ക് ശേഷം ആശുപത്രിക്ക് സമീപത്തെ മരത്തില് വിശ്വനാഥനെ തൂങ്ങിമരിച്ച നിലയില് കണ്ടെത്തുകയായിരുന്നു. മോഷണക്കുറ്റം ആരോപിച്ച് സുരക്ഷാ ജീവനക്കാര് ചോദ്യംചെയ്തതിന് പിന്നാലെയാണ് വിശ്വനാഥനെ കാണാതായതെന്നാണ് വീട്ടുകാര് ആരോപിക്കുന്നത്.
രോഗിയുടെ കൂട്ടിരിപ്പുകാര്ക്ക് ഇരിക്കാനുള്ള സ്ഥലത്ത് ഇരിക്കുന്നതിനിടെ ഒരാളുടെ പഴ്സും മൊബൈല് ഫോണും നഷ്ടപ്പെട്ടു. ഇത് മോഷ്ടിച്ചത് വിശ്വനാഥനാണെന്ന് ആരോപിച്ചായിരുന്നു ആക്രമണം. അപമാനഭാരം സഹിക്കവയ്യാതെയാണ് മകന് ആത്മഹത്യ ചെയ്തതെന്നാണ് കുടുംബം ആരോപിക്കുന്നത്
വിശ്വനാഥന്റെ മരണവുമായി ബന്ധപ്പെട്ട് നിരവധി പരാതികള് ഇതിനകം പൊലീസിന് ലഭിച്ചിട്ടുണ്ട്. ആള്ക്കൂട്ടാക്രമണം നടന്നിട്ടുണ്ടോ എന്ന് പരിശോധിക്കണമെന്നും പരാതിയില് പറയുന്നു. സംഭവവുമായി ബന്ധപ്പെട്ട് മെഡിക്കല് കോളജിലെ സിസിടിവി ദൃശ്യങ്ങളും പരമാവധി മൊഴികളും പൊലീസ് രേഖപ്പെടുത്തിയിട്ടുണ്ട്.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള് അറിയാന് ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ