സൈനിക പരിശീലനത്തിനിടെയുണ്ടായ അപകടത്തില്‍ സിംഗപ്പൂരിയന്‍ നടന്‍ അലോഷ്യസ് പാങ് മരിച്ചു. ന്യുസിലന്‍ഡില്‍ നടന്ന സൈനിക പരിശീലനത്തിനിടെ വെടിയേറ്റതിനെത്തുടര്‍ന്നാണ് മരണം സംഭവിച്ചത്. ശനിയാഴ്ചയാണ് അപകടമുണ്ടായത്. അതീവ ഗുരുതരാവസ്ഥയിലായിരുന്ന പാങ് വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തിയിരുന്നത്.
പരിശീലനത്തിനിടെ നെഞ്ചിലും അടിവയറ്റിലുമാണ് പാങിന് വെടിയേറ്റത്. ന്യൂസിലന്‍ഡ് പ്രതിരോധ സേന സംഘടിപ്പിച്ച എക്‌സര്‍സൈസ് തണ്ടര്‍ വാരിയര്‍ എന്ന പരിശീലന പരിപാടിയില്‍ പങ്കെടുക്കവെയാണ് പാങിന് അപകടം സംഭവിച്ചത്. ഉടന്‍തന്നെ പാങിനെ ആശുപത്രിയില്‍ പ്രവേശിപ്പിച്ചിരുന്നു. അഞ്ചര മണിക്കൂറോളം നീണ്ടുനിന്ന സര്‍ജറിക്ക് വിധേയനാക്കിയെങ്കിലും സ്ഥിതി മെച്ചപ്പെടാതിരുന്നതിനെത്തുടര്‍ന്ന് തീവ്രപരിചരണ വിഭാഗത്തില്‍ ചികിത്സയിലായിരുന്നു.
രാജ്യത്തെ സേവിക്കാനായി പോകുന്നു എന്ന് കുറിച്ച് ന്യൂസിലന്‍ഡ് യാത്രയ്ക്ക് മുമ്പായി പാങ് സമൂഹമാധ്യമങ്ങളില്‍ ഒരു ചിത്രം പങ്കുവച്ചിരുന്നു. ഈ മാസം അവസാനം തിരിച്ചെത്തുമെന്ന് ആരാധകരെ അറിയിച്ചിരുന്നതെങ്കിലും ഇതിനിടയില്‍ അപകടം സംഭവിക്കുകയായിരുന്നു.
സിനിമകളിലും ടിവി സീരീസുകളിലൂടെ അഭിനയിത്തിലേക്കെത്തിയ പാങ് സിനിമകളിലും സജീവമായിരുന്നു. മികച്ച പുതുമുഖ നടനുള്ള സ്റ്റാര്‍ അവാര്‍ഡ് അടക്കം വിജയിച്ച പാങ് പോപ്പുലര്‍ മെയില്‍ ആര്‍ട്ടിസ്റ്റ് വിഭാഗത്തില്‍ ആദ്യ പത്തില്‍ ഇടം നേടിയിട്ടുമുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
