വിയന്ന: പൊലീസുകാര്‍ പരിശോധനയ്ക്ക് എത്തിയപ്പോള്‍ അധോവായു വിട്ടതിന് യുവാവിന് കനത്ത പിഴ ചുമത്തി. 500 യൂറോ (42,936 രൂപ) ആണ് പൊലീസ് പിഴയിട്ടത്. പരിശോധനയ്ക്ക് ഉദ്യോഗസ്ഥരെത്തിയപ്പോള്‍ ഉച്ചത്തില്‍ അധോവായു വിട്ടത്തിനാണ് ഓസ്ട്രിയന്‍ പൊലീസ് യുവാവിന് വന്‍ തുക പിഴ ചുമത്തിയത്.
ബെഞ്ചില്‍ ഇരിക്കുകയായിരുന്ന യുവാവ് പോലീസെത്തിയപ്പോള്‍ ഇരിപ്പില്‍ നിന്ന് പിന്‍ഭാഗമുയര്‍ത്തി കീഴ് വായു പുറത്തേക്ക് വിടുകയായിരുന്നു. യുവാവിന്റേത് മനഃപൂര്‍വമുള്ള പ്രവൃത്തിയാണെന്നും പൊലീസ് പറയുന്നു. അബദ്ധത്തിലാണ് ഇങ്ങനെ സംഭവിച്ചിരുന്നതെങ്കില്‍ ശിക്ഷ നല്‍കില്ലായിരുന്നു. മനഃപൂര്‍വമാണെന്ന് ബോധ്യപ്പെട്ടതിനാലാണ് പിഴ ചുമത്തിയതെന്നും പൊലീസ് വ്യക്തമാക്കി.
ആനുപാതികമല്ലാത്തതും നീതിരഹിതവുമായ പിഴശിക്ഷയാണ് തനിക്ക് ലഭിച്ചതെന്ന് യുവാവ് പരാതിയുയര്‍ത്തിയതോടെയാണ് സംഭവം വിവാദമായത്. ജൂണ്‍ അഞ്ചിന് നടന്ന സംഭവത്തില്‍ നിരവധി പേര്‍ സാമൂഹികമാധ്യമങ്ങളിലൂടെ പ്രതികരണവുമായി രംഗത്തെത്തി. തുടര്‍ന്ന് പിഴത്തുകയെ സംബന്ധിച്ച് യുവാവിന് വേണമെങ്കില്‍ കോടതിയെ സമീപിക്കാവുന്നതാണെന്ന് പൊലീസ് അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
