കോവ്ഡ് 19: ജാ​ഗ്രതയില്ലെങ്കിൽ അതിവേഗം പടരും, ഒപി കാഷ്വൽറ്റി സന്ദർശനം വേണ്ട; പാലിക്കേണ്ട നിർദേശങ്ങൾ ഇവ 

പത്തനംതിട്ടയിൽ അഞ്ച് പേർക്ക് കോവിഡ് സ്ഥിരീകരിച്ചതിന് പിന്നാലെ ഇന്ന് രാവിലെ കൊച്ചിയിലും മൂന്ന് വയസ്സുകാരന് കൊറോണ ബാധ റിപ്പോർട്ട് ചെയ്യപ്പെട്ടു. കൊറോണ ജാ​ഗ്രത സംസ്ഥാനത്ത് നിലനിൽക്കുന്ന സാഹചര്യത്തിൽ  ലോകാരോഗ്യ സംഘടന അംഗീകരിച്ച ചികിത്സാ മാനദണ്ഡങ്ങൾ കർശനമായി പാലിക്കാൻ ആരോ​ഗ്യമന്ത്രി കെ.കെ. ശൈലജ നിർദേശം നൽകി. 

പാലിക്കണം ഈ നിർദേശങ്ങൾ

• വിദേശ രാജ്യങ്ങളിൽ നിന്നെത്തിയവർ ജില്ലാ മെഡിക്കൽ ഓഫിസർമാരുമായോ അടുത്തുള്ള സർക്കാർ ആരോഗ്യ കേന്ദ്രവുമായോ നിർബന്ധമായും ഫോൺ മുഖേന ബന്ധപ്പെടണം.
• വൈറസ് ബാധയുടെ ലക്ഷണങ്ങൾ ഉള്ളവർ ഒപിയിലോ കാഷ്വൽറ്റിയിലോ പോകരുത്. ഇവർ ഈ വിവരം നോഡൽ ഓഫിസറെ അറിയിച്ചശേഷം ഐസലേഷൻ സൗകര്യമുള്ള ആശുപത്രിയിൽ എത്തണം.
• ജാഗ്രത പുലർത്തിയില്ലെങ്കിൽ വൈറസ് അതിവേഗം പടരും.
• പനി, തൊണ്ടവേദന, ചുമ എന്നിവയാണ് പ്രധാന ലക്ഷണങ്ങൾ. ചിലർക്ക് വയറിളക്കവും ഉണ്ടാകും. വൈറസ് ബാധ തീവ്രമായാൽ മരണം വരെ സംഭവിക്കാൻ സാധ്യതയുണ്ട്. പ്രതിരോധ മരുന്നോ കൃത്യമായ ചികിത്സയോ ഇല്ലാത്തതിനാൽ എന്തെങ്കിലും രോഗമുള്ളവർക്ക് വൈറസ് ബാധിക്കുന്നത് കൂടുതൽ അപകടകരമാണ്.
• എല്ലാ രാജ്യാന്തര യാത്രക്കാർക്കും കണക്‌ഷൻ വിമാനങ്ങളിലെത്തുന്ന ആഭ്യന്തര യാത്രക്കാർക്കും പരിശോധന കർശനമാക്കിയിട്ടുണ്ട്. രോഗസംശയമുള്ളവരെ വീടുകളിൽ 28 ദിവസം നിരീക്ഷിക്കും. ഇവരും വീട്ടിലുള്ളവരും മറ്റുള്ളവരുമായി സമ്പർക്കവും പാടില്ല.വിദ്യാഭ്യാസ സ്ഥാപനങ്ങളിലോ ജോലിക്കോ പോകരുത്.