കൊച്ചി: ചരിത്രം ഇതിഹാസപുരുഷനായി വാഴത്തിയ കുഞ്ഞാലി മരയ്ക്കാറായി മോഹന്‍ലാല്‍ എത്തുന്നു. മരക്കാര്‍ അറബിക്കടലിന്റെ സിംഹം എന്ന പേരില്‍ പ്രിയദര്‍ശന്‍ ഒരുക്കുന്ന ചിത്രത്തിന്റെ ഭാഗമായാതായി മോഹന്‍ലാല്‍ സമൂഹമാധ്യമങ്ങളിലുടെ അഭിപ്രായപ്പെട്ടു. ഒടിയന് പിന്നാലെ ബിഗ്ബജറ്റില്‍ ഒരുക്കുന്ന ചിത്രത്തിന്റെ നിര്‍മ്മാണം ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ്.
മലയാളസിനിമയിലെ ഏറ്റവും ചിലവേറിയ സിനിമയായിരിക്കും മോഹന്‍ലാലിന്റെ കുഞ്ഞാലി മരയ്ക്കാര്‍. അഞ്ചു ഭാഷകളിലാണ് ഒരുങ്ങുന്നത്. 200 കോടിയാണ് ചിത്രത്തിന്റെ ബജറ്റെന്നാണ് റിപ്പോര്‍ട്ടുകള്‍.
കുഞ്ഞാലി മരക്കാര്‍-അറബിക്കടലിന്റെ സിംഹം സിനിമയുടെ ചിത്രീകരണം ഡിസംബര്‍ ഒന്നുമുതലാണ് ഹൈദരാബാദില്‍ ആരംഭിച്ചത്. മോഹന്‍ലാല്‍ ഞായറാഴ്ച മുതലാണ് ചിത്രത്തിന്റെ ഭാഗമായത്. ചിത്രത്തിന്റെ സെറ്റിന്റെ നിര്‍മാണം നേരത്തെ ഹൈദരാബാദിലെ റാമോജി ഫിലിം സ്റ്റുഡിയോയില്‍ തുടങ്ങിയിരുന്നു. ബാഹുബലിക്ക് സെറ്റൊരുക്കിയ മലയാളി സാബു സിറിളാണ് ചിത്രത്തിന്റെ കലാ സംവിധാനമൊരുക്കുന്നത്. ചിത്രത്തിനായുള്ള വലിയ കപ്പലുകളുടെ നിര്‍മ്മാണമാണ് നേരത്തെ ഹൈദരാബാദില്‍ തുടങ്ങിയത്.
വന്‍ താരനിരയാണ് ചിത്രത്തിന് പുറകിലുള്ളത്. മോഹന്‍ലാലിന്റെ കുട്ടിക്കാലം മകന്‍ പ്രണവ് മോഹന്‍ലാലാണ് അവതരിപ്പിക്കുക എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. കുഞ്ഞാലി മരയ്ക്കാര്‍ ഒന്നാമനായി മധുവാണ് അഭിനയിക്കുക. സുനില്‍ ഷെട്ടിയും ചിത്രത്തിന്റെ പ്രധാന ഭാഗമാകും. സിദ്ദിഖ്, നെടുമുടി വേണു എന്നിവരും പ്രധാന വേഷങ്ങളിലെത്തുന്നുണ്ട്. നായിക വേഷങ്ങളില്‍ കീര്‍ത്തി സുരേഷ്, കല്യാണി പ്രിയദര്‍ശന്‍, മഞ്ജു വാര്യര്‍ തുടങ്ങിയവരാണ് അഭിനയിക്കുക. ചായാഗ്രഹണം സൂര്യയുടെ 24ലൂടെ ദേശീയ അവാര്‍ഡ് കരസ്ഥമാക്കിയ തിരുവാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ