തന്റെ സ്വകാര്യ ജീവിതത്തിലേക്ക് കടക്കാന്‍ ആര്‍ക്കും അധികാരമില്ലെന്നും അതിന്റെ പൂര്‍ണ്ണ നിയന്ത്രണം തന്റെ കൈയ്യില്‍ തന്നെയായിരിക്കണമെന്നും ബോളിവുഡ് താരം സോനം കപൂര്‍. ആനന്ദ് അഹൂജയുമായുള്ള വിവാഹവും വിവാഹവേദിയുമെല്ലാം വാര്‍ത്തകളില്‍ ചര്‍ച്ചചെയ്യപ്പെടുന്നതിന്റെ അതൃപ്തിയിലാണ് താരത്തിന്റെ ഈ അഭിപ്രായപ്രകടനം.
തന്നേക്കുറിച്ചുള്ള കാര്യങ്ങള്‍ തുറന്നുപറയാന്‍ തയ്യാറാണെന്നും എന്നാല്‍ ഈ വിഷയത്തില്‍ മറ്റൊരു വ്യക്തി കൂടി ഉള്‍പ്പെട്ടിട്ടുണ്ട്, അതിനാല്‍ അദ്ദേഹത്തിന്റെ സ്വകാര്യതയെ ബഹുമാനിക്കേണ്ട ഉത്തരവാദിത്വം തനിക്കുണ്ടെന്നുമാണ് സോനത്തിന്റെ വാക്കുകള്‍. വിവാഹത്തേക്കുറിച്ചുള്ള മാധ്യമപ്രവര്‍ത്തകന്റെ ചോദ്യത്തിന് മറുപടി പറയുകയായിരുന്നു സോനം.
എന്തുകൊണ്ടാണ് എപ്പോഴും നടിമാരോട് മാത്രം എപ്പോഴും അവരുടെ സ്വകാര്യ ജീവിതവുമായി ബന്ധപ്പെട്ട ചോദ്യങ്ങളുണ്ടാകുന്നതെന്നും ആരെങ്കിലും ഇതുവരെ രണ്‍ബീര്‍ കപൂറിനോടോ രണ്‍വീര്‍ സിംഗിനോടോ അവരുടെ വിവാഹവുമായി ബന്ധപ്പെട്ട കാര്യങ്ങള്‍ അന്വേഷിച്ചിട്ടുണ്ടോ എന്നും സോനം ചോദിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ