ഹോംലി മീല്‍സ്, ബെന്‍ എന്നീ സിനിമകളുടെ സംവിധായകനായ വിപിൻ അറ്റ്ലിയുടെ പുതിയ ചിത്രമാണ് വട്ടമേശ സമ്മേളനം. കഴിഞ്ഞ ആഴ്ച തിയേറ്ററുകളിലെത്തിയ ചിത്രത്തിലെ ഒരു രംഗമാണ് ഇപ്പോൾ വൈറലാകുന്നത്. മോഹൻലാൽ അഭിനയിച്ച സൂപ്പർഹിറ്റ് ചിത്രം നരസിംഹത്തെ ട്രോളുന്ന രംഗമാണ് ഇത്.
തിയറ്ററുകളിൽ ഏറെ കൈയ്യടി നേടിയ, നായകൻ വെള്ളത്തിൽ നിന്ന് പൊങ്ങിവരുന്ന, രംഗത്തെ ട്രോളിക്കൊണ്ടുള്ളതാണ് വട്ടമേശ സമ്മേളനത്തിലെ സീന്‍. സംവിധായകൻ ആക്ഷൻ പറയാൻ വൈകിയതുമൂലം വെള്ളത്തിനടിയിൽ നായകന്‌ ശ്വാസം കിട്ടാതെയായി പോകുന്നതാണ് രംഗം.
എട്ട് യുവസംവിധായകരുടെ എട്ട് ചെറുചിത്രങ്ങളടങ്ങുന്ന സിനിമയാണ് വട്ടമേശസമ്മേളനം. ഈ മാസം 25നാണ് ചിത്രം തിയറ്ററുകളിലെത്തിയത്. അമരേന്ദ്രന്‍ ബൈജുവാണ് ചിത്രം നിർമ്മിച്ചിരിക്കുന്നത്.
വിപിന്‍ ആറ്റ്ലിയുടെ ‘പര്‍ര്‍’, വിജീഷ് എ.സി.യുടെ ‘സൂപ്പര്‍ ഹീറോ’, സൂരജ് തോമസിന്റെ ‘അപ്പു’, സാഗര്‍ വി.എ.യുടെ ‘ദൈവം നമ്മോടു കൂടെ’, ആന്റോ ദേവസ്യയുടെ ‘മേരി’, അനില്‍ ഗോപിനാഥിന്റെ ‘ടൈം’, അജു കുഴിമലയുടെ ‘കൂട്ടായി ആരായി’, നൌഫാസ് നൗഷാദിന്റെ ‘മാനിയാക്ക്’ എന്നീ ചിത്രങ്ങളാണ് വട്ടമേശസമ്മേളനത്തില്‍ ഉള്ളത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ