ആരാധകർ സ്നേഹത്തോടെ തല എന്ന് വിളിക്കുന്ന അജിത്തിനെ വിവാഹം ചെയ്തതോടെ അഭിനയത്തോട് വിടപറയുകയായിരുന്നു നടി ശാലിനി. എങ്കിലും ശാലിനിയോടുള്ള ആരാധകരുടെ ഇഷ്ടത്തിന് ഇപ്പോഴും കുറവൊന്നുമില്ല. അജിത്തിനും മക്കളായ അനൗഷ്കയ്ക്കും ആദ്വിക്കിനും ഒപ്പം ശാലിനിയെ എവിടെ കണ്ടാലും ആരാധകർ ആ സ്നേഹം പ്രകടിപ്പിക്കാറുമുണ്ട്. ഇപ്പോൾ മകൻ ആദ്വിക്കിനൊപ്പമുളള ശാലിനിയുടെ പുതിയ ചിത്രങ്ങളാണ് സമൂഹമാധ്യമങ്ങളിൽ വൈറലാവുന്നത്.

ഇരുവരും കാറില്‍ സഞ്ചരിക്കവെ ഒരു ആരാധകന്‍ പകർത്തിയതാണ് ചിത്രം. മേക്കപ്പൊന്നുമില്ലാതെ കെയ്യിൽ ഒരു പഴയ മോഡല്‍ മൊബൈലുമായി കാറിലിരിക്കുന്ന ശാലിനിയെയാണ് ഫോട്ടോയിൽ കാണുന്നത്. മകൻ ആദ്വിക്കിനെ ചേർത്തുപിടിച്ചിട്ടുമുണ്ട്. നാലു വയസുളള ആദ്വിക്കിനെ ‘കുട്ടി തല’ എന്ന പേരിലാണ് അജിത് ആരാധകർ വിളിക്കുന്നത്.

സ്മാര്‍ട്ട് ഫോണ്‍ യു​ഗം എന്ന് വിശേഷിപ്പിക്കുന്ന ഈ കാലത്തും ശാലിനി ഉപയോ​ഗിക്കുന്ന പഴയ ഫീച്ചർ ഫോൺ ആണെന്നത് ആരാധകർക്ക് അത്ഭുതമാണ്. മുമ്പും ശാലിനിയുടെ ഫോൺ വാർത്തകളിൽ നിറഞ്ഞിട്ടുണ്ട്. 3310 മോഡല്‍ നോക്കിയ ഫോണ്‍ കൈയില്‍ പിടിച്ചുകൊണ്ടുള്ള ശാലിനിയുടെ ഒരു ചിത്രം മുമ്പ് വൈറലായിരുന്നു. അജിത്തും സ്മാര്‍ട്ട് ഫോണ്‍ ഉപയോഗിക്കാറില്ലെന്ന് നേരത്തേ വാര്‍ത്തകളുണ്ടായിരുന്നു.