കൊറോണ പ്രതിരോധ പ്രവർത്തനങ്ങളിൽ മുൻപന്തിയിലാണ് ബോളിവുഡ് താരം സൽമാൻ ഖാൻ. സിനിമയിലെ ദിവസവേതനക്കാർക്ക് സഹായവുമായി താരം രംഗത്തെത്തിയിരുന്നു. ഇപ്പോൾ തന്റെ ചിത്രത്തിലെ ഒരു റൊമാന്റിക് രംഗത്തെ കൊറോണ പ്രതിരോധത്തിനുള്ള ആയുധമാക്കി മാറ്റിയിരിക്കുകയാണ് താരം. സൽമാൻ അഭിനയിച്ച സൂപ്പർഹിറ്റ് ചിത്രം മേനെ പ്യാർ കിയയിലെ ഒരു രംഗമാണ് താരം കൊറോണക്കാലത്തിലേക്ക് പറിച്ചുനട്ടത്.
കാമുകിയുടെ ചുംബനമുള്ള ഗ്ലാസ് വാളിന് അടുത്തേക്ക് വരുന്ന സൽമാൻ ഖാനെയാണ് ആദ്യ ഭാഗത്ത് കാണിക്കുന്നത്. തുടർന്ന് ഗ്ലാസിൽ ചുംബിക്കുകയാണ് താരം. അതിന് പിന്നാലെ കാണിക്കുന്നത് കൊറോണ കാലത്തെ സൽമാനെയാണ്. കാമുകി ചുംബിച്ച് വരുന്ന സൽമാൻ ഗ്ലാസിൽ തൊടാതെ സാനിറ്റൈസർ ഉപയോഗിച്ച് ക്ലീൻ ചെയ്യുകയാണ്. മേനെ പ്യാർ കിയ ഇപ്പോൾ റിലീസ് ചെയ്തിരുന്നെങ്കിൽ എന്ന അടിക്കുറിപ്പിലാണ് താരം വിഡിയോ പങ്കുവെച്ചിരിക്കുന്നത്. ഈസ്റ്റർ ആശംസകളും താരം അറിയിച്ചിട്ടുണ്ട്.
ലോക്ക്ഡൗണിനെ തുടർന്ന് തന്റെ ഫാം ഹൗസിൽ മൃഗങ്ങൾക്കൊപ്പം സമയം ചെലവഴിക്കുകയാണ് താരം. തന്റെ സോഷ്യൽ മീഡിയയിലൂടെ കൊറോണ ബോധവൽക്കരണം താരം നടത്തുന്നുണ്ട്. കൂടാതെ ഫാം ഹൗസിലെ മൃഗങ്ങൾക്കൊപ്പമുള്ള രഹസകരമായ വിഡിയോകളും താരം പങ്കുവെച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ