കെജിഎഫ് എന്ന സിനിമകൊണ്ട് തെന്നിന്ത്യയിലെ ആക്ഷൻ സൂപ്പർതാരമായ നടനാണ് യഷ്. കട്ടത്താടിയും നീണ്ട മുടിയുമായി വരുന്ന റോക്കി ഭായി ആരാധകർക്ക് ആവേശമാണ്. ഇപ്പോൾ ചിത്രത്തിന്റെ രണ്ടാം ഭാ​ഗത്തിനായുള്ള കാത്തിരിപ്പിലാണ് ആരാധകർ. എന്നാൽ ഇനി റോക്കി ഭായിയെ കട്ടത്താടിയില്ലാതെ കാണേണ്ടിവരും. രണ്ടാം ഭാ​ഗത്തിന്റെ ചിത്രീകരണം പൂർത്തിയാക്കിയതോടെയാണ് താരം താടി വടിച്ച് പുത്തൻ ലുക്കിൽ എത്തിയത്. 

ഭാര്യയ്ക്കും ആരാധകർക്കുമൊപ്പം ആഘോഷപൂർവമാണ് താരം താടി കളഞ്ഞത്. ഇപ്പോൾ സോഷ്യൽ മീഡിയയിൽ വൈറലാവുകയാണ് താടി വടിക്കുന്നതിന്റെ വിഡിയോ ആണ്. കെജിഎഫ് 2 സിനിമയുടെ ചിത്രീകരണം പൂർത്തിയായതോടെയാണ് മനസില്ലാ മനസോടെ തന്റെ നീണ്ട താടിവടിക്കാൻ യഷ് തീരുമാനിച്ചത്. താടി ട്രിം ചെയ്തതിനൊപ്പം താരം മുടിയും വെട്ടി. പുത്തൻ ലുക്കിൽ സുന്ദരനാണ് താരം. 

കോവിഡിനെ തുടർന്ന് കെജിഎഫിന്റെ ഷൂട്ടിങ് നീണ്ടുപോവുകയായിരുന്നു. ഓഗസ്റ്റ് 26നാണ് സിനിമയുടെ ചിത്രീകരണം പുനരാരംഭിച്ചത്. 90 ശതമാനം ചിത്രീകരണവും കോവിഡ് എത്തുന്നതിനു മുന്‍പേ സംവിധായകന്‍ പ്രശാന്ത് നീല്‍ പൂര്‍ത്തിയാക്കിയിരുന്നു. രാമോജി റാവു ഫിലിം സിറ്റിയിൽ സിനിമയ്ക്കായി ബ്രഹ്മാണ്ഡ സെറ്റും ഒരുക്കിയിരുന്നു. സഞ്ജയ് ദത്ത് ആണ് ചിത്രത്തിലെ അധീര എന്ന പ്രതിനായക കഥാപാത്രത്തെ അവതരിപ്പിക്കുന്നത്.   കാന്‍സര്‍ ചികിത്സയ്ക്കായി ചിത്രീകരണത്തില്‍ നിന്നും ഇടവേള എടുത്തുന്ന അദ്ദേഹം നവംബർ 25ന് ഷൂട്ടിങിൽ വീണ്ടും ജോയിൻ ചെയ്തിരുന്നു. ഡിസംബർ പകുതിയോടെ ചിത്രത്തിന്റെ ഷൂട്ടിങ് പൂർണമായും പൂർത്തിയാകും.