ബോളിവുഡ് നടൻ സുശാന്ത് സിങ് രജ്പുത്തിന്റെ മരണം വ്യക്തിപരമായി ബാധിച്ചവർ നിരവധിയാണ്. ഇപ്പോൾ ബോളിവുഡ് വിടുന്നുവെന്ന സൂചന നൽകിക്കൊണ്ട് രം​ഗത്തെത്തിയിരിക്കുകയാണ് സുശാന്തിന്റെ അവസാന ചിത്രത്തിലെ നായിക സഞ്ജന സാൻഖി. ഇൻസ്റ്റ​ഗ്രാമിലൂടെയാണ് താരം സിനിമ വിടുന്നതായി കുറിച്ചത്. സുശാന്തിന്റെ അവസാന ചിത്രമായിരുന്ന ദിൽബേചരായിലെ നായികയാണ് സഞ്ജന.  

മുംബൈ വിട്ട് ഡൽഹിയിലേക്ക് തിരിച്ചുപോവുകയാണ് എന്നാണ് സഞ്ജന കുറിച്ചത്. താൻ കടന്നു പോകുന്ന വിഷമഘട്ടത്തെക്കുറിച്ചും താരം പറയുന്നുണ്ട്. കവിതയുടെ രൂപത്തിലാണ് സഞ്ജനയുടെ വാക്കുകൾ. ''മുംബൈയ്ക്കു വിട, ഞാൻ നിന്നെ കാണുന്നത് നീണ്ട നാല് മാസങ്ങൾക്ക് ശേഷമാണ്. ഞാൻ ‍‍‍ഡൽഹിയിലേക്ക് മടങ്ങുകയാണ്. നിന്റെ വഴികൾ വ്യത്യസ്‌തമായി അനുഭവപ്പെട്ടു, അവ ശൂന്യമാണ്. ഒരുപക്ഷേ എന്റെ ഹൃദയത്തിലെ വേദന ഞാൻ കാര്യങ്ങൾ കാണുന്ന രീതിയെ മാറ്റുന്നുണ്ടാകാം. അല്ലെങ്കിൽ, നിങ്ങൾക്കും ചില വേദനയുണ്ട്. വീണ്ടും കാണാം? ഉടൻ. അല്ലെങ്കിൽ ഇല്ലായിരിക്കാം''

സുശാന്തിന്റെ മരണ ശേഷം സഞ്ജന വല്ലാതെ അസ്വസ്ഥയാണെന്ന് സുഹൃത്തുക്കൾ പറഞ്ഞതായി റിപ്പോർട്ടുകളുണ്ട്. ബാന്ദ്ര പൊലീസ് സ്റ്റേഷനിലെത്തി മൊഴി നൽകിയവരിൽ സഞ്ജനയും ഉണ്ടായിരുന്നു. നായികയായി സഞ്ജന അരങ്ങേറ്റം കുറിച്ച ചിത്രമായിരുന്നു ദിൽബേചാര. ചിത്രത്തിന്റെ റിലീസ് തിയതി പ്രഖ്യാപിച്ചതിന് പിന്നാലെയാണ് സിനിമതന്നെ ഉപേക്ഷിക്കാനുള്ള സഞ്ജനയുടെ തീരുമാനം. ജൂലൈ 24–ന് ഡിസ്നി ഹോട്ട്സ്റ്റാറിലൂടെയാണ് ദിൽബേചാര റിലീസിനെത്തുന്നത്.