യുവനടനും സൂപ്പർതാരം മോഹൻലാലിന്റെ മകനുമായ പ്രണവ് മോ​ഹൻലാലിന് ഇന്ന് ജന്മദിനം. മകന് മനോഹരമായ പിറന്നാൾ ആശംസ അറിയിച്ചുകൊണ്ട് മോഹൻലാലും സോഷ്യൽ മീഡയയിൽ കുറിപ്പ് പങ്കുവെച്ചു. തന്റെ കുട്ടി മനുഷ്യൻ ഇനി അത്ര കുട്ടിയല്ല എന്നാണ് താരം കുറിക്കുന്നത്.

എന്റെ കുഞ്ഞ് പയ്യൻ ഇനി മുതൽ ചെറിയ ആളല്ല. പ്രായം കൂടുന്നതിനനുസരിച്ച് മികച്ച വ്യക്തിയായി മാറുന്നതിൽ എനിക്ക് അഭിമാനം മാത്രമാണ്. ഹാപ്പി ബർത്ത്ഡേ- മോഹൻലാൽ കുറിച്ച്. മകനൊപ്പമുള്ള മനോഹരമായ ചിത്രങ്ങൾക്കൊപ്പമാണ് കുറിപ്പ്. കുട്ടിക്കാലത്തെ ചിത്രത്തിൽ പ്രണവിനെ ഇടുത്ത് ഉമ്മവെക്കുന്ന മോഹൻലാലിനെയാണ് കാണുന്നത്. കൂടാതെ മകനെ ചേർത്തുപിടിച്ചുകൊണ്ടുള്ള ഇപ്പോഴത്തെ ചിത്രവുമുണ്ട്. പ്രിയതാരത്തിന് ആശംസകൾ അറിയിച്ചുകൊണ്ട് നിരവധി പേരാണ് കമന്റ് ചെയ്യുന്നത്.

അച്ഛനും അമ്മയ്ക്കും മറ്റ് കുടുംബ സുഹൃത്തുക്കൾക്കുമൊപ്പം പ്രണവ് തന്റെ 30ാം പിറന്നാൾ ആഘോഷിച്ചു. ചെന്നൈയിലെ വീട്ടിൽവച്ച് കേക്ക് മുറിച്ചായിരുന്നു ആഘോഷം. ലോക്ഡൗൺ കാലം ആരംഭിച്ചതു മുതൽ ചെന്നൈയിലെ വീട്ടിലാണ് മോഹൻലാലും കുടുംബവും. 1990 ജൂലൈ 13–നാണ് മോഹൻലാൽ സുചിത്ര ദമ്പതികളുടെ മകനായി പ്രണവ് ജനിക്കുന്നത്. വിനീത് ശ്രീനിവാസൻ സംവിധാനം ചെയ്യുന്ന ഹൃദയമാണ് താരത്തിന്റെ ഇനി പുറത്തിറങ്ങാനുള്ള ചിത്രം.