പ്രമുഖ റിയാലിറ്റി ഷോയായ ബി​ഗ് ബോസ് മലയാളത്തിന്റെ സീസൺ 2 താത്കാലികമായി നിർത്തിവയ്ക്കുന്നതായി അണിയറപ്രവർത്തകർ. കൊവിഡ് രോഗബാധയെ തുടര്‍ന്നാണ് തീരുമാനം. ഷോയുടെ നിർമാതാക്കളായ എൻഡമോൾ ഷൈനിന്റെ ഔദ്യോഗിക ഫേസ്ബുക്ക് പേജിലാണ് ഇതു സംബന്ധിച്ച അറിയിപ്പ് പുറത്തുവിട്ടത്.

വൈറസ് ബാധയുടെ പശ്ചാതലത്തിൽ ജീവനക്കാരുടെ സുരക്ഷയെ കരുതി നിർമാണ പ്രവർത്തനങ്ങൾ താൽക്കാലികമായി നിർത്തിവയ്ക്കുമെന്നാണ് അറിയിച്ചിട്ടുള്ളത്. ജീവനക്കാരുടെയും കലാകാരന്മാരുടെയും ആരോഗ്യത്തിനും സുരക്ഷിതത്വത്തിനും ഊന്നൽനൽകിയാണ് ഇത്തരത്തിലൊരു തീരുമാനമെന്നും നിർമാതാക്കൾ അറിയിച്ചു.

‌എൻഡെമോൾ ഷൈൻ ഇന്ത്യയുടെ കീഴിൽ നടക്കുന്ന എല്ലാ പരിപാടികളുടെയും അഡ്മിനിസ്ട്രേറ്റീവ്, പ്രൊഡക്ഷൻ പ്രവർത്തനങ്ങൾ താത്കാലികമായി നിർത്തിവയ്ക്കുന്നു എന്നാണ് അറിയിപ്പ്. ഈ പാശ്ചത്തലത്തിലാണ് മലയാളത്തിലെ സീസണ്‍ 2വിനും തിരശ്ശീല വീഴുന്നത്. 

മോഹന്‍ലാല്‍ അവതാരകനായ ബിഗ്ബോസ് മലയാളം സീസണ്‍2 കഴിഞ്ഞ ദിവസങ്ങളിൽ ഏറെ വാർത്താ പ്രാധാന്യം നേടിയിരുന്നു. ഷോയിലെ മത്സരാർത്ഥിയായ ഡോ. രജിത് കുമാറിന്റെ പുറത്താകലും അദ്ദേഹത്തിന് കൊച്ചി വിമാനത്താവളത്തിൽ നൽകിയ സ്വീകരണ‌വും വിവാദമായിരുന്നു. ഇതിന് പിന്നാലെ രജിത് അടക്കമുള്ളവരെ പൊലീസ് കസ്റ്റഡിയിലെടുക്കകുയുമുണ്ടായി.