ആമസോൺ പ്രൈമിലൂടെ ഓണം റിലീസായി മലയാളികൾക്കു മുന്നിലെത്തിയ സിനിമയാണ് ഹോം. ഹൃദയം തൊടുന്ന ഒരു കുടുംബചിത്രം. ഇന്ദ്രൻസാണ് ചിത്രത്തിൽ പ്രധാന കഥാപാത്രമായി എത്തിയത്. മികച്ച അഭിപ്രായമാണ് ചിത്രത്തിന് ലഭിക്കുന്നത്. ഇപ്പോൾ ചിത്രത്തെ പ്രശംസിച്ചുകൊണ്ട് രംഗത്തെത്തിയിരിക്കുകയാണ് തമിഴ് സൂപ്പർഹിറ്റ് സംവിധായകൻ എആർ മുരുഗദോസ്. ചിത്രത്തിന്റെ സംവിധായകൻ റോജിൻ തോമസിന് അദ്ദേഹം സന്ദേശം അയക്കുകയായിരുന്നു.
'ഗുഡ് ഈവനിംഗ് ബ്രദർ, ഇത് സംവിധായകൻ മുരുഗദോസാണ്. ഹോം കണ്ടു. അസാധ്യ സിനിമ. അതിനന്ദനങ്ങൾ', എന്നാണ് മുരുഗദോസ് കുറിച്ചത്. മെസേജിന്റെ സ്ക്രീൻ ഷോട്ട് പങ്കുവെച്ചുകൊണ്ട് റോജിൻ തന്നെയാണ് സന്തോഷം പങ്കുവെച്ചത്. എന്റെ ജീവിതത്തിന്റെ ഈ ഭാഗമാണ് സന്തോഷം എന്ന അടിക്കുറിപ്പിലാണ് റോജിന്റെ പോസ്റ്റ്.
ശ്രീനാഥ് ഭാസി, മഞ്ജു പിള്ള, നസ്ലിന്‍, വിജയ് ബാബു, ജോണി ആന്റണി, മണിയന്‍പിള്ള രാജു തുടങ്ങിയവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചത്. ഫ്രൈഡെ ഫിലിം ഹൗസിന്റെ ബാനറില്‍ വിജയ് ബാബുവാണ് ചിത്രം നിര്‍മ്മിച്ചത്. നീല്‍ ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ പ്രജീഷ് പ്രകാശാണ്. രാഹുല്‍ സുബ്രഹ്‌മണ്യമാണ് ചിത്രത്തില്‍ സംഗീതം ഒരുക്കിയിരിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ