വര്ഷങ്ങള് നീണ്ട കാത്തിരിപ്പിനൊടുവില് ബോളിവുഡ് സൂപ്പര്താരം ഷാരുഖ് ഖാൻ തിരിച്ചെത്തുകയാണ്. പത്താന് എന്ന ആക്ഷന് ത്രില്ലര് ചിത്രത്തിലൂടെയാണ് താരത്തിന്റെ മടങ്ങി വരവ്. ഇപ്പോള് ആരാധകരുടെ ആവേശം ഉയര്ത്തിക്കൊണ്ട് മറ്റൊരു വാര്ത്ത എത്തുക. ഷാരുഖ് ഖാന്റെ തിരിച്ചുവരവിന് കൂട്ടായി സല്മാന് ഖാന് ഉണ്ടാകുമെന്നാണ് റിപ്പോര്ട്ടുകള്. പത്താനില് കാമിയോ റോളിലാണ് സല്മാന് ഖാന് എത്തുന്നത്.
ബിഗ് ബാസ്സില് വച്ചാണ് സല്മാന് പത്താനില് അഭിനയിക്കുന്നതിനെക്കുറിച്ച് തുറന്നു പറഞ്ഞത്. തന്റെ തിരക്കേറിയ ഷെഡ്യൂളിനെക്കുറിച്ച് പറയുന്നതിനിടെയാണ് പത്താനും കയറിവന്നത്. ജീവിതം മുന്നോട്ടുപോകും, ഷോയും മുന്നോട്ടുപോകും. ഷോ അവസാനിക്കുമ്പോള് ഞങ്ങള് പത്താനിലേക്ക് പോകും. അവിടെനിന്ന് ടൈഗറിലേക്കും കഭി ഈദ് കഭീ ദിവാലിയിലും അഭിനയിക്കും- സല്മാന് പറഞ്ഞു.
ഇതിനു മുന്പും സൂപ്പര്താരങ്ങള് പരസ്പരം പിന്തുണയുമായി എത്തിയിട്ടുണ്ട്. 2017 ല് പുറത്തിറങ്ങിയ സല്മാന്റെ ട്യൂബ് ലൈറ്റില് ഷാരുഖ് എത്തിയിരുന്നു. തൊട്ടുപിന്നാലെ ഇറങ്ങിയ ഷാരുഖിന്റെ സീറോയില് സല്മാനും അഭിനയിച്ചു. നവംബറിലാണ് പത്താന്റെ ചിത്രീകരണം ആരംഭിച്ചത്. ഈ വര്ഷം തന്നെ ചിത്രം പ്രേക്ഷകരിലേക്ക് എത്തും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ