സുരേഷ് ഗോപിയുടെ 250-ാം സിനിമയായി അണിയറയിൽ ഒരുങ്ങുന്ന 'ഒറ്റക്കൊമ്പൻ' ഇതിനോടകം ഏറെ ചർച്ചയായിക്കഴിഞ്ഞു. ഇപ്പോഴിതാ ഒറ്റക്കൊമ്പനിലെ ലുക്കിലുള്ളൊരു ചിത്രം സോഷ്യൽ മീഡിയയിൽ പങ്കുവെച്ചിരിക്കുകയാണ് സുരേഷ് ഗോപി. ചിത്രത്തിൽ സുരേഷ് ഗോപിയുടെ കുടുംബത്തോടൊപ്പം നടി ജോമോളുമുണ്ട്.
അപ്രതീക്ഷിതമായി ജോമോളെ കണ്ട ആരാധകർ ഒറ്റക്കൊമ്പനിൽ താരവും അഭിനയിക്കുന്നുണ്ടോ എന്ന സംശയത്തിലാണ്. എന്നാൽ ഇതു സംബന്ധിച്ച് സിനിമയുടെ അണിയറപ്രവർത്തകർ ഔദ്യോഗിക വിവരങ്ങളൊന്നും പുറത്തുവിട്ടിട്ടില്ല. 2017-ൽ കെയർഫുൾ എന്ന സിനിമയിലാണ് ജോമോൾ ഒടുവിൽ അഭിനയിച്ചത്. ഇപ്പോഴിതാ ഒറ്റക്കൊമ്പനിൽ സുരേഷ് ഗോപിയോടൊപ്പം ജോമോളും അഭിനയിക്കുന്നുണ്ടെന്ന രീതിയിലാണ് ചർച്ചകൾ.
കടുവാക്കുന്നേൽ കുറുവച്ചൻ എന്ന കഥാപാത്രത്തെ കേന്ദ്രീകരിച്ചാണ് ഒറ്റക്കൊമ്പൻ ഒരുങ്ങുന്നത്. കടുവാക്കുന്നേൽ കുറുവച്ചൻ എന്നുതന്നെയാണ് ചിത്രത്തിന് ആദ്യം പേരിട്ടത്. പിന്നീട് പൃഥ്വിരാജിൻറെ 'കടുവ' എന്ന സിനിമയുമായുണ്ടായ നിയമയുദ്ധത്തിന് പിന്നാലെ സിനിമയുടെ പേരിൽ മാറ്റം വരുത്തി. 25 കോടിക്ക് മുകളിൽ ബജറ്റിൽ ഒരുങ്ങുന്ന ചിത്രം ടോമിച്ചൻ മുളകുപ്പാടമാണ് നിർമ്മിക്കുന്നത്. മാത്യു തോമസാണ് ചിത്രം സംവിധായകൻ.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ