ബ്രെയിൻ ട്യൂമർ ബാധിതനായ ആരാധകന് സൂം മീറ്റിങ്ങിലെത്തി സർപ്രൈസ് ഒരുക്കി ഉലകനായകൻ കമലഹാസൻ. സാകേത് എന്ന യുവാവിന് ധൈര്യം പകരാനാണ് കമലഹാസൻ സൂം വിഡിയോയിൽ എത്തിയത്. ടെർമിനൽ ബ്രെയിൻ ട്യൂമർ ബാധിതനാണ് യുവാവ്.
അപ്രതീക്ഷിതമായി കമൽഹാസനെ സ്ക്രീനിൽ കണ്ട സാകേത് അക്ഷരാർത്ഥത്തിൽ ഞെട്ടി. സാങ്കേതിന്റെ സഹോദരിയാണ് ഇതിന് വഴിയൊരുക്കിയത്. ആദ്യം പറ്റിക്കാനാണെന്ന് കരുതിയെങ്കിലും പിന്നീട് ഇരുവരും വാചാലരായി. 10 മിനിറ്റിലധികം താരം സാകേതിനോടും കുടുംബത്തോടും സംസാരിച്ചു. താൻ ജീവിതത്തിലേക്ക് തിരിച്ചുവരുമെന്നാണ് യുവാവ് താരത്തോട് പറഞ്ഞത്. നാട്ടിൽ വരുമ്പോൾ കാണാൻ പറ്റുമോ എന്ന് ചോദിച്ചപ്പോൾ കണ്ടിരിക്കും എന്നായിരുന്നു കമൽഹാസന്റെ മറുപടി.
കമൽഹാസനോടുള്ള ആരാധനയാൽ മകനെ ‘വിരുമാണ്ടി’ എന്ന ഓമനപ്പേരിട്ട് വിളിക്കാറുണ്ടെന്നു യുവാവ് പറഞ്ഞു. കുടുംബം എങ്ങനെയിരിക്കുന്നു എന്ന സാകേതിന്റെ ചോദ്യത്തിന് ഞാനിപ്പോൾ സംസാരിച്ചുകൊണ്ടിരിക്കുന്നത് എന്റെ ഒരു കുടുംബാംഗത്തിനോടാണ് എന്നാണ് കമലഹാസൻ പറഞ്ഞത്. "ആരും തോൽക്കാനായി ജനിക്കുന്നില്ല. ജയിക്കാനാണ് നമ്മളുടെ വിധി. ജീവിതത്തിലേക്ക് തിരിച്ചു വരാൻ ശ്രമിച്ചുകൊണ്ടിരിക്കണം. സാകേത് സർവ ആരോഗ്യത്തോടും കൂടി തിരിച്ചു വരും", താരം പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ