മമ്മൂട്ടി മുഖ്യമന്ത്രിയായി എത്തുന്ന വണ്‍ സിനിമയുടെ ട്രെയിലര്‍ പുറത്ത്. കേരള രാഷ്ട്രീയമാണ് ചിത്രത്തില്‍ നിറഞ്ഞു നില്‍ക്കുന്നത്. കടയ്ക്കല്‍ ചന്ദ്രന്‍ എന്ന ശക്തനായ മുഖ്യമന്ത്രിയായാണ് മമ്മൂട്ടി എത്തുന്നത്. സമകാലീന രാഷ്ട്രീയ സംഭവങ്ങള്‍ ചിത്രം ചര്‍ച്ച ചെയ്യുന്നുണ്ടെന്നാണ് ട്രെയിലറില്‍ നിന്ന് ലഭിക്കുന്ന സൂചനകള്‍.
'കണ്ട അമ്പട്ടന്റെ മോനൊക്കെ മുഖ്യമന്ത്രിയായാല്‍ ഇതല്ല ഇതിനപ്പുറവും നടക്കും' എന്ന ഡയലോഗിലാണ് ട്രെയിലര്‍ ആരംഭിക്കുന്നത്. ശക്തമായ ഡയലോഗുകളും രണ്ട് മിനിറ്റ് വരുന്ന ട്രെയിലറില്‍ ഉള്‍പ്പെടുത്തിയിട്ടുണ്ട്. എന്തായാലും ആരാധകര്‍ക്കിടയില്‍ വൈറലാവുകയാണ് ട്രെയിലര്‍.
മുരളി ഗോപിയും ചിത്രത്തില്‍ സുപ്രധാന റോളില്‍ എത്തുന്നുണ്ട്. പ്രതിപക്ഷ നേതാവിന്റെ വേഷത്തിലാണ് താരം എത്തുന്നത്. ഇവരെ കൂടാതെ ജോജു ജോര്‍ജു, നിമിഷ സജയന്‍, സലിംകുമാര്‍, ജഗതീഷ്. മാത്യു തോമസ്, ഇഷാനി തുടങ്ങിയ വലിയ താരനിര തന്നെ ചിത്രത്തില്‍ അണിനിരക്കുന്നുണ്ട്. സന്തോഷ് വിശ്വനാഥാണ് ചിത്രം സംവിധാനം ചെയ്യുന്നത്. ബോബി സഞ്ജയ് ആണ് തിരക്കഥ. നിര്‍മാണം ആര്‍ ശ്രീലക്ഷ്മി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ