തമിഴ് സംവിധായകനും ഗായകനുമായ അരുണ്‍രാജ കാമരാജിന്റെ ഭാര്യ സിന്ദുജ അന്തരിച്ചു. കോവിഡ് ബാധിച്ച് ആശുപത്രിയില്‍ ചികിത്സയിലിരിക്കെ ഇന്നലെ വൈകിട്ടാണ് അന്ത്യം. അരുണ്‍രാജയും കോവിഡ് ബാധിതനായി ആശുപത്രിയില്‍ ചികിത്സയിലാണ്. അദ്ദേഹത്തിന്റെ അവസ്ഥ മെച്ചപ്പെട്ടുവരികയാണ്.
കുറച്ചു ദിവസങ്ങള്‍ക്കു മുന്‍പാണ് അരുണ്‍രാജയും സിന്ദുജയും കോവിഡ് ബാധിതയാവുന്നത്. അവസ്ഥ മോശമായതിനെ തുടര്‍ന്ന് ദമ്പതികളെ ചെന്നൈയിലെ ആശുപത്രിയില്‍ പ്രവേശിപ്പിക്കുകയായിരുന്നു. തമിഴ് സിനിമാലോകത്തെ ഞെട്ടിച്ചിരിക്കുകയാണ് സിന്ദുജയുടെ മരണം. നിരവധി പേരാണ് ആദരാഞ്ജലികള്‍ അര്‍പ്പിച്ചുകൊണ്ട് രംഗത്തെത്തിയത്.
സംവിധായകന്‍ എന്ന നിലയില്‍ മാത്രമല്ല, ഗാനരചയീതാവ്, ഗായകന്‍, നടന്‍ എന്നീ നിലകളിലും ശ്രദ്ധേയനാണ് അരുണ്‍രാജ. പിസ സിനിമയില്‍ ഗാനരചയിതാവായാണ് അരുണ്‍രാജ തന്റെ സിനിമാ കരിയര്‍ ആരംഭിക്കുന്നത്. രാജാ റാണിയിലൂടെ അഭിനേതാവായും അരങ്ങേറ്റം നടത്തി. ശിവകാര്‍ത്തികേയന്‍ ചിത്രം കനായിലൂടെ സംവിധായകനുമായി. കബാലിയിലെ ഏറെ പ്രശസ്തമായ 'നെരുപ്പ് ഡാ' എന്ന ഗാനം പാടിയിരിക്കുന്നതും അരുണ്‍രാജയാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ