രഞ്ജിത്ത് ശങ്കറും ജയസൂര്യയും ഒന്നിച്ച സണ്ണി ദിവസങ്ങൾക്ക് മുൻപാണ് പ്രേക്ഷകരിലേക്ക് എത്തിയത്. വിദേശത്തു നിന്നെത്തി ക്വാറന്റീനിൽ കഴിയുന്ന സണ്ണി എന്ന കഥാപാത്രമായാണ് ജയസൂര്യ എത്തുന്നത്. ജയസൂര്യ മാത്രം സ്ക്രീനിൽ എത്തുന്ന ചിത്രത്തിൽ മറ്റു കഥാപാത്രങ്ങൾ ശബ്ദസാന്നിധ്യമായാണ് എത്തുന്നത്. ചിത്രത്തിലെ നായികാ കഥാപാത്രമായ 'നിമ്മി'യെ അവതരിപ്പിച്ചിരിക്കുന്നത് ശിവദയാണ്. നിമ്മിയുടെ ഫോൺ നമ്പറായി ഒരു നമ്പറും ചിത്രത്തിൽ കാണിക്കുന്നുണ്ട്. എന്നാൽ ഇതുകാരണം പുലിവാലു പിടിച്ചിരിക്കുന്നത് രഞ്ജിത്ത് ശങ്കറിന്റെ ഒരു അസിസ്റ്റന്റാണ്.
സിനിമ റി‌ലീസായതിന് പിന്നാലെ നിമ്മി എന്ന പേരിൽ സേവ് ചെയ്തിരിക്കുന്ന നമ്പറിലേക്ക് മെസേജുകളുടെ ബഹളമാണ്. സംവിധായക സഹായിയായ സുധീഷ് ഭരതന്‍റേതാണ് ഈ നമ്പർ. ഒരാഴ്ചയായി വന്നുകൊണ്ടിരിക്കുന്ന മെസേജ് ബഹളത്തിൽ കഷ്ടപ്പെടുന്ന തന്റെ സഹായിയെക്കുറിച്ച് രഞ്ജിത്ത് ശങ്കർ തന്നെയാണ് കുറിപ്പ് വങ്കുവെച്ചത്.
"സണ്ണിയിൽ നിമ്മിയുടെ നമ്പർ ആയി കാണിച്ചിരിക്കുന്നത് എന്‍റെ അസിസ്റ്റന്‍റ് ആയ സുധീഷ് ഭരതന്‍റേതാണ്. ഒരാഴ്ചയായി അതിൽ മെസേജുകളുടെ ബഹളം ആണ്. ഇനി അയക്കുന്നവർ ശ്രദ്ധിക്കുക" - രഞ്ജിത്ത് ശങ്കർ കുറിച്ചു. ആമസോൺ പ്രൈമിലൂടെ റിലീസായ ചിത്രത്തിന് ഇതിനോടകം വിവിധ അംഗീകാരങ്ങളാണ് തേടിയെത്തിയിരിക്കുന്നത്. ധാക്ക ഇന്‍റര്‍നാഷണല്‍ ഫിലിം ഫെസ്റ്റിവല്‍, സ്പെയിനിലെ കല്ലേല ഫിലിം ഫെസ്റ്റിവല്‍ എന്നിവിടങ്ങളിലെ മത്സരവിഭാഗത്തിലേക്ക് ഈ ചിത്രം തെരഞ്ഞെടുക്കപ്പെട്ടിട്ടുണ്ട്
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ