ജൂഡ് ആന്തണി സംവിധാനം ചെയ്ത '2018' കരാർ ലംഘിച്ച് ഒടിടിക്ക് നേരത്തെ നൽകിയതിൽ പ്രതിഷേധിച്ച് സിനിമാ തീയറ്ററുകൾ അടച്ചിടാൻ തീരുമാനിച്ചിരിക്കുകയാണ് ഫിയോക്ക്. 2018 നാളെ ഒടിടി പ്ലാറ്റ്ഫോമായ സോണി ലിവിൽ റിലീസ് ചെയ്യുന്നതിനെതിരെയാണ് തീയറ്റർ ഉടമകളുടെ സംഘടനയായ ഫിയോക്ക് രം​ഗത്തെത്തിയിരിക്കുന്നത്. ഇപ്പോഴിതാ ഈ വിഷയത്തിൽ വിശദീകരണം നൽകിയിരിക്കുകയാണ് ജൂഡ്. 

സിനിമയുടെ റിലീസിന് മുൻപ് നിർമാതാവിനെ സേഫ് ആക്കുന്നതാണ് തന്റെ രീതിയെന്നും ഇതാരും മനഃപൂർവം ചെയ്തതല്ലെന്നും ആണ് ജൂഡ് പറയുന്നത്.തീയറ്ററുകാരുടെ സമരത്തെ മാനിക്കുന്നു എന്നുപറഞ്ഞ ജൂഡ് ഇത് ബിസിനസ്സിന്റെ ഭാ​ഗമാണെന്നും കൂട്ടിച്ചേർത്തു. 

"തീയറ്ററുകാരുടെ സമരത്തെ മാനിക്കുന്നു. സിനിമ റിലീസിന് മുൻപ് നിർമാതാവിനെ സേഫ് ആക്കുന്ന രീതിയാണ് എനിക്കുള്ളത് . അത് കൊണ്ടാണ് സോണി ലൈവ് ഡീൽ വന്നപ്പോൾ അതൊരു ദൈവാനുഗ്രഹം ആയി കണ്ടത് . ഇതാരും മനഃപൂർവം ചെയ്യുന്നതല്ല. ഇത് ബിസിനസ്സിന്റെ ഭാ​ഗമാണ്. റിലീസിനും മുൻപേ ഞങ്ങളുടെ സിനിമയിൽ വിശ്വാസമർപ്പിച്ചതിന് സോണി ലിവിന് നന്ദി ‌പറയുന്നു. ഞങ്ങളുടെ സിനിമയെ സ്നേഹിച്ചതിന് നിങ്ങൾക്കെല്ലാവർക്കും നന്ദി. തീയറ്റർ ഉടമകളും കാണികളും, നിങ്ങളാണ് യഥാർത്ഥ ഹീറോകൾ", ജൂഡ് ഫേയ്സ്ബുക്കിൽ കുറിച്ചു. 

ഈ വാര്‍ത്ത കൂടി വായിക്കൂ 

നാളെയും മറ്റന്നാളും സംസ്ഥാനത്ത് തീയറ്ററുകള്‍ അടച്ചിടും

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ