കൊല്‍ക്കത്ത: ബംഗാൡ ഡെങ്കിപ്പനി ബാധിച്ചവരുടെ യഥാര്‍ത്ഥ കണക്കുകള്‍ മമത ബാനര്‍ജി സര്‍ക്കാര്‍ മറച്ചുവെക്കുന്നുവെന്ന് ആരോപിച്ച് ഫെയ്‌സ്ബുക്ക് പോസ്റ്റിട്ട ഡോക്ടറെ സസ്‌പെന്റു ചെയതു. ഡോക്ടര്‍ അരുണാചല്‍ ദത്ത ചൗധരിയുടെ പോസ്റ്റ് ജനങ്ങളെ തെറ്റിദ്ധരിപ്പിക്കുന്നുവെന്നും ആരോഗ്യരംഗത്തെ അപകീര്‍ത്തിപ്പെടുത്തുന്നതാണെന്നും ചൂണ്ടിക്കാട്ടിയാണ് സര്‍ക്കാര്‍ ഡോക്ടറെ സസ്‌പെന്റ് ചെയ്തത്. 

ബംഗാളില്‍ ഡങ്കിപ്പനി ബാധിച്ച് മരിക്കുന്നവരുടെ എണ്ണം വര്‍ധിക്കുന്നതായാണ് റിപ്പോര്‍ട്ട്. എന്നാല്‍ ഇത്തരത്തിലുള്ള വാര്‍ത്തകളില്‍ അടിസ്ഥാനമില്ലെന്നും പേടിക്കേണ്ട സാഹചര്യമില്ലെന്നുമാണ് മുഖ്യമന്ത്രിയുടെ നിലപാട്. പകര്‍ച്ചപ്പനി തടയാനുള്ള നടപടികള്‍ സര്‍ക്കാര്‍ കൈക്കൊണ്ടതായും സ്ഥാപിത താത്പര്യക്കാര്‍ ജനങ്ങളില്‍ ഭീതിപടര്‍ത്താന്‍ ശ്രമിക്കുകയാണെന്നുമാണ് മുഖ്യമന്ത്രിയുടെ വാദം. ഡെങ്കിപ്പനി ബാധിച്ച് സംസ്ഥാനത്ത് 19 പേര്‍ മാത്രമാണ് മരിച്ചതെന്നാണ് സര്‍ക്കാരിന്റെ കണക്ക്. സംസ്ഥാനത്തെ വിവിധ ആശുപത്രികളിലായി 18,000ത്തിലധികം പേര്‍ ഡെങ്കിപ്പനിയെ തുടര്‍ന്ന് ചികിത്സ തേടുന്നുണ്ട്. എന്നാല്‍ സര്‍ക്കാരിന്റെ കണക്ക് യാഥാര്‍ത്ഥ്യം മറച്ചുവെക്കുന്നതെന്നാണ് മറുവാദം.