ന്യൂഡല്‍ഹി: സമൂഹമാധ്യമങ്ങളെ നിരീക്ഷിക്കാനുള്ള പദ്ധതി കേന്ദ്ര സര്‍ക്കാര്‍ പിന്‍വലിച്ചു. വിവാദമായ പദ്ധതി തുടങ്ങും മുന്‍പേ ഉപേക്ഷിക്കാനുള്ള തീരുമാനം അറ്റോര്‍ണി ജനറല്‍ കെ.കെ. വേണുഗോപാല്‍ സുപ്രീം കോടതിയെ അറിയിച്ചു. തുടര്‍ന്ന്, പദ്ധതിക്കെതിരെയുള്ള ഹര്‍ജി ചീഫ് ജസ്റ്റിസ് ദീപക് മിശ്ര അധ്യക്ഷനായ മൂന്നംഗ ബെഞ്ച് തീര്‍പ്പാക്കി.
വ്യക്തികള്‍ കൈമാറുന്ന സന്ദേശങ്ങളുടെ ഉള്ളടക്കമുള്‍പ്പെടെ സമൂഹ മാധ്യമങ്ങളിലൂടെയുള്ള ആശയവിനിമയം നിരീക്ഷിക്കാനുള്ള നീക്കത്തെ നേരത്തേ സുപ്രീം കോടതി വിമര്‍ശിച്ചിരുന്നു. നിരീക്ഷിക്കുന്ന ഭരണകൂടമെന്ന സ്ഥിതിയിലേക്കു മാറുകയാണോയെന്നാണ് കഴിഞ്ഞ 13നു കോടതി ചോദിച്ചത്.
സമൂഹമാധ്യമങ്ങളെ നിരീക്ഷിക്കാനുള്ള വാര്‍ത്താ വിതരണ പ്രക്ഷേപണ മന്ത്രാലയത്തിന്റെ പദ്ധതിക്കെതിരെ ബംഗാളില്‍നിന്നുള്ള തൃണമൂല്‍ കോണ്‍ഗ്രസ് എംഎല്‍എ മഹുവ മൊയ്ത്ര നല്‍!കിയ പൊതുതാല്‍പര്യ ഹര്‍ജിയാണ് കോടതി പരിഗണിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ