ന്യൂഡല്‍ഹി: കര്‍ഷക പ്രക്ഷോഭത്തിന്റെ ചുവടുപിടിച്ച് രാജസ്ഥാന്‍ നിയമസഭ തെരഞ്ഞെടുപ്പില്‍ നിലമെച്ചപ്പെടുത്തി സിപിഎം. കഴിഞ്ഞ തവണ ഒരു സീറ്റുപോലും ലഭിക്കാതിരുന്ന സിപിഎം ഇത്തവണ രണ്ടു സീറ്റുകളില്‍ വ്യക്തമായ ലീഡോടുകൂടി മുന്നേറുകയാണ്.
കഴിഞ്ഞ തവണ ബിജെപി വിജയിച്ച ബദ്ര, ദുംഗ്രാ മണ്ഡലങ്ങളിലാണ് സിപിഎം ലീഡ് ഉയര്‍ത്തുന്നത്. ബദ്ര മണ്ഡലത്തില്‍ ബല്‍വാനും ദുംഗ്രാ മണ്ഡലത്തില്‍ ഗിര്‍ധരിലാലുമാണ് മുന്നിട്ടുനില്‍ക്കുന്നത്. മൂന്ന് സീറ്റുകളില്‍ വിജയിക്കുമെന്നും ഏഴ് സീറ്റുകളില്‍ 10,000ത്തോളം വോട്ടു നേടുമെന്നുമായിരുന്നു സിപിഎമ്മിന്റെ അവകാശ വാദം. എന്നാല്‍ രണ്ട് സീറ്റുകളില്‍ വിജയം ഏതാണ്ട് ഉറപ്പിച്ചു കഴിഞ്ഞിരിക്കുകയാണ് സിപിഎം.
ഇതിന് മുന്‍പ് 2008ലാണ് സിപിഎം ഏറ്റവും കൂടുതല്‍ നേട്ടമുണ്ടാക്കിയത്. ധോദ്, ദാന്തരാംഗഡ്,അനുപ്‌നഗര്‍ എന്നിവിടങ്ങളിലായിരുന്നു അന്ന് സിപിഎം വിജയം നേടിയത്.
കര്‍ഷക പിന്തുണയോടെയാണ് സിപിഎമ്മിന്റെ രാജസ്ഥാനിലെ ചെറുതെങ്കിലും വിലപ്പെട്ടതായ ഈ മുന്നേറ്റം. കര്‍ഷകരെ അണിനിരത്തി നിരവധി പ്രക്ഷോഭങ്ങള്‍ക്ക് രാജസ്ഥാനില്‍ സിപിഎം നേതൃത്വം നല്‍കിയിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ