ബെംഗളൂരു: ബിജെപിക്കൊപ്പം നില്‍ക്കുന്നവരാണ് നല്ല മുസ്ലീങ്ങളെന്ന് ബിജെപി നേതാവ് കെഎസ് ഈശ്വരപ്പ. കോണ്‍ഗ്രസിനൊപ്പം നില്‍ക്കുന്ന മുസ്ലീങ്ങള്‍ കൊലപാതകികളാണെന്നും അദ്ദേഹം കൂട്ടിച്ചേര്‍ത്തു.
തുമാകുരുവല്‍ മാധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം. 22 ആര്‍എസ്എസ് -ബിജെപി പ്രവര്‍ത്തകരെ കൊലപ്പെടുത്തിയ മുസ്‌ലിങ്ങള്‍ കോണ്‍ഗ്രസിനൊപ്പമുള്ളവരാണ്. എന്നാല്‍ നല്ല മുസ്‌ലിങ്ങളെല്ലാം ബി.ജെ.പിക്കാരാണെന്നും ഈശ്വരപ്പ പറഞ്ഞു.അസദുദ്ദീന്‍ ഒവൈസിയുമായി ബിജെപിക്ക് ബന്ധമുണ്ടെന്ന് തെളിയിക്കുന്ന രേഖകള്‍ പുറത്തുവിടാന്‍ കര്‍ണ്ണാടക മുഖ്യമന്ത്രി സിദ്ധരാമയ്യയേയും ആഭ്യന്തരമന്ത്രി രാമലിംഗറെഡ്ഡിയേയും വെല്ലുവിളിച്ച ഈശ്വരപ്പ അതിനുകഴിഞ്ഞില്ലെങ്കില്‍ ഇവര്‍ രണ്ടുപേരും പരസ്യമായി മാപ്പ് പറയണമെന്നും ആവശ്യപ്പെട്ടു. ഒവൈസിയുമായി ബിജെപിക്ക് യാതൊരു ബന്ധവുമില്ലെന്നും അദ്ദേഹം പറഞ്ഞു.
സംസ്ഥാനം ഭരിച്ച കോണ്‍ഗ്രസിന് ഭരണകാലത്തെ വികസനവുമായി ഒന്നും പറയാനില്ല. അതുകൊണ്ട് അവര്‍ സംസ്ഥാനത്തെ ജാതിയുടേയും മതത്തിന്റേയും പേരില്‍ വിഭജിക്കുകയാണെന്നും അദ്ദേഹം പറഞ്ഞു. മുഖ്യമന്ത്രിയും ആഭ്യന്തരമന്ത്രിയും തന്നെ കൊലപ്പെടുത്തുമെന്ന ഭീഷണി ഗൗരവത്തില്‍ എടുക്കുന്നില്ലെന്നും അദ്ദേഹം പറഞ്ഞു
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ