ന്യൂഡല്‍ഹി: നീണ്ടക്കാലത്തെ അനിശ്ചിതത്വങ്ങള്‍ക്ക് ഒടുവില്‍ കോണ്‍ഗ്രസ് പ്രവര്‍ത്തക സമിതിയെ പ്രഖ്യാപിച്ചു.  51 അംഗങ്ങളുളള പ്രവര്‍ത്തക സമിതിയില്‍ കേരളത്തില്‍ നിന്ന് എ കെ ആന്റണിയും ഉമ്മന്‍ ചാണ്ടിയും കെ സി വേണുഗോപാലും ഇടംപിടിച്ചു. മുതിര്‍ന്ന കോണ്‍ഗ്രസ് നേതാവായ പി സി ചാക്കോ സ്ഥിരം ക്ഷണിതാവാകും. സമിതിയില്‍ 23  അംഗങ്ങളും 18 ക്ഷണിതാക്കളും, 10 പ്രത്യേക ക്ഷണിതാക്കളും ഉള്‍പ്പെടുന്നു. ഇതില്‍ അംഗങ്ങളുടെ പട്ടികയിലാണ് ആന്റണിയും ഉമ്മന്‍ ചാണ്ടിയും വേണുഗോപാലും ഇടംപിടിച്ചത്.പ്രവര്‍ത്തക സമിതിയുടെ ആദ്യ യോഗം 22ന് ചേരും.

 സംസ്ഥാനങ്ങളുടെ ചുമതലയുളള ജനറല്‍ സെക്രട്ടറിമാരെ സ്ഥിരം ക്ഷണിതാക്കളായി തെരഞ്ഞെടുത്തു. 23 അംഗങ്ങളില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്ക് പുറമേ സോണിയാ ഗാന്ധി, മന്‍മോഹന്‍ സിങ്, മോട്ടിലാല്‍ വോറ, ഗുലാം നബി ആസാദ്, മല്ലികാര്‍ജ്ജുന്‍ ഖാര്‍ഗെ, അഹമ്മദ് പട്ടേല്‍ തുടങ്ങിയ നേതാക്കളാണ് ഇടംപിടിച്ചിരിക്കുന്നത്. 

ലോക്‌സഭ തെരഞ്ഞെടുപ്പ് അടുത്തിരിക്കുന്ന പശ്ചാത്തലത്തില്‍ പാര്‍ട്ടിയെ ഒരുക്കുന്നതിന്റെ ഭാഗമായാണ് പ്രവര്‍ത്തക സമിതി രൂപീകരിച്ചത്. പ്രവര്‍ത്തക സമിതി രൂപീകരിച്ച് പുനസംഘടന പൂര്‍ത്തിയാക്കാത്തതില്‍ വിവിധ കേന്ദ്രങ്ങള്‍ അതൃപ്തി രേഖപ്പെടുത്തിയതിന് പിന്നാലെയാണ് ദ്രുതഗതിയില്‍ നടപടികള്‍ സ്വീകരിച്ചത്.