ന്യൂഡൽഹി: മദ്യപിച്ച് സ്വബോധം നഷ്ടപ്പെട്ട അജ്ഞാതൻ ദീപാവലി ആഘോഷിച്ചത് 18 വാഹനങ്ങൾക്ക് തീക്കൊളുത്തി. തെക്കന്‍ ‍ഡൽഹിയിലെ മദ‌ന്‍ഗിറില്‍ ഇന്നലെയായിരുന്നു സംഭവം. നാല് കാറും 14 ഇരുചക്ര വാഹനങ്ങളുമാണ് ഇയാൾ അ​ഗ്നിക്കിരയാക്കിയതെന്ന് പൊലീസ് പറയുന്നു. 

തീപ്പിടിത്തത്തില്‍ പത്ത് വാഹനങ്ങള്‍ പൂര്‍ണ്ണമായും എട്ട് വാഹനങ്ങള്‍ ഭാഗികമായും കത്തിനശിച്ചു. ഇതിൽ എട്ട് ബൈക്കുകളും രണ്ട് കാറുകളും പൂര്‍ണമായും ആറ് ഇരുചക്ര വാഹനങ്ങളും രണ്ട് കാറുകളും ഭാ​ഗികമായും കത്തിനശിച്ചു. സംഭവത്തിന്റെ സിസിടിവി ദൃശ്യങ്ങൾ പൊലീസ് പരിശോധിച്ച് വരികയാണ്. 

നിര്‍ത്തിയിട്ട ഇരുചക്ര വാഹനങ്ങളുടെ ഫ്യൂവൽ പൈപ്പ് തുറന്ന് പെട്രോള്‍ പുറത്തേക്കൊഴുക്കിയ ശേഷമാണ് ഇയാൾ തീവെച്ചതെന്ന് സിസിടിവി ദൃശ്യങ്ങളിൽ നിന്ന് വ്യക്തമാണ്. ഇങ്ങനെ ആറോളം ബൈക്കുകൾക്കാണ് തീയിട്ടത്. ഈ വാഹനങ്ങളില്‍ നിന്നുള്ള തീ സമീപത്ത് നിർത്തിയിട്ടിരുന്ന കാറുകളിലേക്കും പടർന്ന് പിടിക്കുകയായിരുന്നു.

പുലർച്ചെ 3.30ഓടെയാണ് വിവരം പൊലീസ് അറിയുന്നത്. എന്നാൽ പൊലീസ് സ്ഥലത്തെത്തിയപ്പോഴേക്കും പ്രതി കടന്നുകളഞ്ഞു.