കുവൈറ്റ് സിറ്റി: ശബരിമല വിഷയത്തില്‍ നിലപാട് ചോദിച്ചതില്‍ ദേഷ്യപ്പെട്ട് ബിജെപി വക്താവ് മീനാക്ഷി ലേഖി വാര്‍ത്താസമ്മേളനത്തില്‍ നിന്ന് ഇറങ്ങിപ്പോയി. ശബരിമലയെക്കുറിച്ചുള്ള തുടര്‍ച്ചയായ ചോദ്യങ്ങളില്‍ അതൃപ്തയായാണ് വനിത നേതാവിന്റെ ഇറങ്ങിപ്പോക്ക്. കുവൈറ്റില്‍ ബിജെപിയുടെ പോഷക സംഘടനയായ ഭാരതീയ പ്രവാസി പരിഷത്തിന്റെ പത്രസമ്മേളനത്തിന് ഇടയിലായിരുന്നു സംഭവം.
ശബരിമല സ്ത്രീ പ്രവേശന വിഷയത്തില്‍ വനിതാ നേതാവ് എന്ന നിലയിലുള്ള അഭിപ്രായമെന്തെന്ന ചോദ്യത്തിന് ജസ്റ്റിസ് ഇന്ദു മല്‍ഹോത്രയുടെ നിലപാട് എന്നാണ് ഇവര്‍ മറുപടി നല്‍കിയത്. തുടര്‍ന്ന് ബിജെപി വക്താവ് എന്ന നിലയില്‍ ബിജെപിയുടെ ഔദ്യോഗിക നിലപാട് എന്താണ് എന്നായി മാധ്യമങ്ങള്‍. ഇത് കേട്ട് പ്രകോപിതയായ മീനാക്ഷി ലേഖി പറയാനുള്ളത് പറഞ്ഞു കഴിഞ്ഞെന്നും പറഞ്ഞ് വേദി വിടുകയായിരുന്നു.
മീനാക്ഷി ലേഖിയുടെ പെട്ടെന്നുള്ള ഇറങ്ങിപ്പോക്ക് വേദിയിലുണ്ടായിരുന്ന ബിജെപി സംസ്ഥാന പ്രസിഡന്റ് പി.എസ്.ശ്രീധരന്‍ പിള്ള ഉള്‍പ്പെടെയുള്ളവരെ സ്തബ്ധരാക്കി. വാര്‍ത്താസമ്മേളനം അവസാനിച്ചോ എന്ന ചോദ്യത്തിന് ഇല്ലെന്ന മറുപടിയുമായി തുടര്‍ന്ന് ശ്രീധരന്‍ പിള്ള പത്രലേഖകരുടെ ചോദ്യത്തിന് മറുപടി നല്‍കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ