മറയൂര്‍: തമിഴ്‌നാട്ടില്‍ ജല്ലിക്കെട്ടിന് ഉപയോഗിക്കുന്ന കാളയുടെ വയറ്റില്‍ കണ്ടെത്തിയത് 38 കിലോ പ്ലാസ്റ്റിക്ക് മാലിന്യം. മൂന്നു മണിക്കൂര്‍ നീണ്ട ശസ്ത്രക്രിയയിലൂടെയാണ് മാലിന്യം നീക്കം ചെയ്തത്. മധുര ജില്ലയിലെ പുത്തൂര്‍ വെറ്ററിനറി ആശുപത്രിയിലാണ് ശസ്ത്രക്രിയ നടന്നത്.
മധുര വാടിപ്പെട്ടി ചിത്തിലങ്ങാടി സ്വദേശി അഴക്മണിയുടെ ജല്ലിക്കെട്ട് കാള കുറേ ദിവസങ്ങളായി ഭക്ഷണം കഴിക്കാതെ അവശനിലയിലായി. വയര്‍ ഭാഗം വീര്‍ത്തു വരുന്നതും ശ്രദ്ധയില്‍പ്പെട്ടതിനെ തുടര്‍ന്നാണ് പുത്തൂരിലുള്ള വെറ്ററിനറി ഡോക്ടര്‍ സുരേഷിനെ സമീപിച്ചത്. വയറ്റില്‍ ദഹിക്കാതെയുള്ള വസ്തുക്കള്‍ ഉണ്ടെന്ന് മനസ്സിലാക്കിയ ഡോക്ടര്‍ കാളയെ ശസ്ത്രക്രിയക്ക് വിധേയമാക്കി പുറത്തെടുത്തത് 38 കിലോ പ്ലാസ്റ്റിക്ക് മാലിന്യങ്ങള്‍ ആയിരുന്നു. ശസ്ത്രക്രിയയെ തുടര്‍ന്ന് കാള സുഖം പ്രാപിച്ചു വരുന്നു. പുത്തൂര്‍ വെറ്ററിനറി സര്‍ജന്‍ ഡോ. ജി സുരേഷ്, ബാലമുരുകന്‍ , തങ്കപാണ്ഡ്യന്‍, ജോണ്‍ സുരേഷ് എന്നിവരടങ്ങുന്ന സംഘമാണ് ശസ്ത്രക്രിയക്ക് നേതൃത്വം നല്‍കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ