ന്യൂഡല്‍ഹി: ഗാന്ധിജയന്തിയോടനുബന്ധിച്ച് ബിജെപി എംപിമാരോട് പദയാത്ര നടത്താന്‍ പ്രധാനമന്ത്രി നരേന്ദ്രമോദിയുടെ ആഹ്വാനം. ഗാന്ധിയുടെ 150-ാം ജന്മവാര്‍ഷികദിനത്തോടനുബന്ധിച്ച് 150 കിലോമീറ്റര്‍ ദൂരം കാല്‍നടയായി യാത്ര ചെയ്യാനാണ് ബിജെപി എംപിമാരോട് മോദി ആവശ്യപ്പെട്ടത്.
ചൊവ്വാഴ്ച ബിജെപി എംപിമാരുടെ യോഗത്തിലാണ് മോദി ഇക്കാര്യം ആവശ്യപ്പെട്ടത്. ഒക്ടോബര്‍ രണ്ടിനും ഒക്ടോബര്‍ 31നും ഇടയില്‍ അതത് മണ്ഡലങ്ങളില്‍ പദയാത്ര നടത്താനാണ് നിര്‍ദേശിച്ചത്. പ്രതിദിനം 15 കിലോമീറ്റര്‍ താണ്ടുന്ന തരത്തില്‍ യാത്രയ്ക്ക് തയ്യാറെടുക്കാനാണ് മോദി യോഗത്തില്‍ ആവശ്യപ്പെട്ടത്.
രാജ്യസഭ എംപിമാരോടും പദയാത്രയില്‍ പങ്കെടുക്കാന്‍ മോദി ആവശ്യപ്പെട്ടു. ബിജെപി ദുര്‍ബലമായ മണ്ഡലങ്ങളില്‍ സന്ദര്‍ശനം നടത്താന്‍ മോദി നിര്‍ദേശിച്ചതായി പാര്‍ലമെന്ററികാര്യ മന്ത്രി പ്രഹ്ലാദ് ജോഷി മാധ്യമങ്ങളോട് പറഞ്ഞു. ഗ്രാമങ്ങളുടെ നവീകരണം ഉള്‍പ്പെടെയുളള ലക്ഷ്യങ്ങള്‍ മുന്‍നിര്‍ത്തിയാണ് പദയാത്ര സംഘടിപ്പിക്കുന്നതെന്നും അദ്ദേഹം വ്യക്തമാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ