സില്‍ചാര്‍: തിരുവനന്തപുരം -സില്‍ചാര്‍ എക്‌സ്പ്രസ് ട്രെയിനിന്റെ മൂന്ന് ബോഗികള്‍ കത്തിനശിച്ചു. അസമിലെ സില്‍ചാര്‍ റെയിൽവേ സ്റ്റേഷനില്‍ നിര്‍ത്തിയിട്ടിരുന്നപ്പോഴാണ് ബോഗികൾക്ക് തീപിടിച്ചത്. സംഭവത്തില്‍ ആര്‍ക്കും പരിക്കില്ലെന്നാണ് റിപ്പോർട്ടുകൾ.
പാന്‍ട്രി കാറിന്റെ തൊട്ടടുത്ത സ്ലീപ്പര്‍ കോച്ചുകൾക്കാണ് തീപിടിച്ചത്. നിറയെ യാത്രക്കാരുമായി തൊട്ടടുത്ത പ്ലാറ്റ്‌ഫോമില്‍ നിര്‍ത്തിയിട്ടിരുന്ന സില്‍ചാര്‍ - അഗര്‍ത്തല ട്രെയിൻ ഉടൻതന്നെ മറ്റൊരു പ്ലാറ്റ്‌ഫോമിലേക്ക് മാറ്റിയതിനാലാണ് വലിയ ദുരന്തം ഒഴിവായത്. ഇന്ന് രാവിലെയാണ് സംഭവം. തിരുവനന്തപുരത്തുനിന്ന് ട്രെയിൽ ഇന്നലെ രാത്രിയാണ് സില്‍ചാറില്‍ എത്തിയത്. ചൊവ്വാഴ്ച രാവിലെ തിരുവനന്തപുരത്തേക്ക് പുറപ്പെടാനിരുന്ന ട്രെയിനിന്റെ കോച്ചുകളാണ് അഗ്നിക്കിരയായത്.
അപകടമുണ്ടായ സമയത്ത് സില്‍ചാര്‍ - തിരുവനന്തപുരം എക്‌സ്പ്രസിന്റെ കൊച്ചുകളെല്ലാം പൂട്ടിയ നിലയിലായിരുന്നതിനാൽ ആരും അപകടത്തില്‍പ്പെട്ടില്ലെന്നാണ് വാർത്താ ഏജൻസിയുടെ റിപ്പോർട്ട്. സംഭവത്തെപ്പറ്റി അന്വേഷണം തുടങ്ങിയതായി റെയിൽവെ അധികൃതർ അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ