ശ്രീനഗര്‍: ജമ്മു കാശ്മീരിലെ പുല്‍വാമയില്‍ പൊലീസ് സ്റ്റേഷന് നേരെ ഉണ്ടായ ഭീകരാക്രമണത്തില്‍ മൂന്ന് പേര്‍ക്ക് പരിക്കേറ്റതായി റിപ്പോര്‍ട്ട്. പരിക്കേറ്റവരുടെ നില അതീവ ഗുരുതരമാണ്. പ്രദേശവാസികളായ മൂന്ന് പേര്‍ക്കാണ് പരിക്കേറ്റത്. ഇവരെ ഉടന്‍ തന്നെ ആശുപത്രിയില്‍ പ്രവേശിപ്പിച്ചിട്ടുണ്ട്.
പൊലീസ് സ്റ്റേഷന് ലക്ഷ്യമാക്കി ഭീകരര്‍ എറിഞ്ഞ ഗ്രനേഡ് ലക്ഷ്യസ്ഥാനത്തെത്തിയില്ല. പകരം സ്റ്റേഷന് പുറത്തുള്ള ജനത്തിരക്കുള്ള റോഡില്‍ വീണ് പൊട്ടുകയായിരുന്നു. പുല്‍വാമയില്‍ സൈന്യത്തിന്റെ കവചിത വാഹനം സ്‌ഫോടനത്തില്‍ തകര്‍ത്തതിന് തൊട്ടടുത്ത ദിവസമാണ് പൊലീസ് സ്‌റ്റേഷനുനേരെ ഗ്രനേഡ് ആക്രമണം നടത്താനുള്ള ശ്രമം.
44 രാഷ്ട്രീയ റൈഫിള്‍സിന്റെ കവചിത വാഹനമാണ് കഴിഞ്ഞ ദിവസം ഭീകരര്‍ തകര്‍ത്തത്. രണ്ട് സൈനികര്‍ വീരമൃത്യു വരിക്കുകയും 16 പേര്‍ക്ക് പരിക്കേല്‍ക്കുകയും ചെയ്തിരുന്നു.
പുല്‍വാമയില്‍ കഴിഞ്ഞ ഫെബ്രുവരിയില്‍ സെന്‍ട്രല്‍ റിസര്‍വ് പൊലീസ് ഫോഴ്‌സിന്റെ (സിആര്‍പിഎഫ്) വാഹന വ്യൂഹത്തിനുനേരെ ജെയ്‌ഷെ മുഹമ്മദ് ഭീകര സംഘടന നടത്തിയ ചാവേര്‍ സ്‌ഫോടനത്തില്‍ 40 ജവാന്മാര്‍ വീരമൃത്യു വരിച്ചിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ