റാഞ്ചി: ആസന്നമായ ഝാര്‍ഖണ്ഡ് നിയമസഭ തെരഞ്ഞെടുപ്പില്‍ സ്ഥാനാര്‍ത്ഥി പട്ടിക പ്രസിദ്ധീകരിച്ച് ബിജെപി. 52 മണ്ഡലങ്ങളില്‍ മത്സരിക്കുന്ന സ്ഥാനാര്‍ത്ഥികളുടെ ആദ്യ പട്ടികയാണ് ബിജെപി പ്രസിദ്ധീകരിച്ചത്.

ഝാര്‍ഖണ്ഡ് നിയമസഭയില്‍ 81 സീറ്റുകളാണുളളത്. ഇതില്‍ 52 സീറ്റുകളില്‍ മത്സരിക്കുന്ന സ്ഥാനാര്‍ത്ഥികളുടെ ആദ്യ പട്ടികയാണ് ബിജെപി പ്രഖ്യാപിച്ചത്. മുഖ്യമന്ത്രി രഘുബര്‍ദാസ് ജംഷഡ്പൂര്‍ ഈസ്റ്റില്‍ നിന്ന് മത്സരിക്കും. ഝാര്‍ഖണ്ഡ് സംസ്ഥാന പ്രസിഡന്റ് ലക്ഷമണ്‍ ഗിലുവ ചക്രദാര്‍പൂരില്‍ നിന്നും മത്സരിക്കുമെന്നും പട്ടിക വ്യക്തമാക്കുന്നു. 

നിലവിലുളള 31 നിയമസഭ അംഗങ്ങള്‍ക്ക് വീണ്ടും സീറ്റ് നല്‍കിയപ്പോള്‍, 10 പേരെ ഒഴിവാക്കി. അഴിമതിക്ക് പേരുകേട്ട ഝാര്‍ഖണ്ഡില്‍ വലിയ മാറ്റം കൊണ്ടുവരാന്‍ അഞ്ചുവര്‍ഷം കൊണ്ട് രഘുബര്‍ദാസ് സര്‍ക്കാരിന് സാധിച്ചുവെന്ന് ബിജെപി വര്‍ക്കിങ് പ്രസിഡന്റ് ജെ പി നഡ്ഡ പറഞ്ഞു. നവംബര്‍ 30 മുതല്‍ ഡിസംബര്‍ 20 വരെ അഞ്ചുഘട്ടങ്ങളിലായാണ് തെരഞ്ഞെടുപ്പ് നടക്കുന്നത്.