ന്യൂഡല്‍ഹി: കര്‍ഷകരുടെ ക്ഷേമം ലക്ഷ്യമിട്ടുളള കിസാന്‍ മന്‍ ധന്‍ യോജന വ്യാഴാഴ്ച പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. അഞ്ചുകോടി ചെറുകിട, ഇടത്തരം കര്‍ഷകര്‍ക്കാണ് ഇത് പ്രയോജനം ചെയ്യുക.  അറുപത് വയസ് തികഞ്ഞാല്‍ പ്രതിമാസം 3000 രൂപ വീതം പെന്‍ഷന്‍ ലഭിക്കുന്നതാണ് പദ്ധതി.

അടുത്ത മൂന്നുവര്‍ഷത്തേയ്ക്ക് 10,774 കോടി രൂപയാണ് ഇതിനായി സര്‍ക്കാര്‍ മാറ്റിവെച്ചിരിക്കുന്നത്. നിലവില്‍ 18നും 40 നും ഇടയില്‍ പ്രായമുളളവര്‍ക്ക് പദ്ധതിയില്‍ ചേരാം. പ്രായമനുസരിച്ച് 55 രൂപ മുതല്‍ 200 രൂപ വീതമാണ് മാസംതോറും ഈ പദ്ധതിയിലേക്ക് അടയ്‌ക്കേണ്ടത്. അങ്ങനെ ചെയ്താല്‍ അറുപതാം വയസ്സില്‍ പ്രതിമാസം 3000 രൂപ വീതം ലഭിക്കുന്ന വിധമാണ് പദ്ധതി വിഭാവനം ചെയ്തിരിക്കുന്നത്. 

പ്രധാനമന്ത്രി കിസാന്‍ സമ്മാന്‍ നിധിയുടെ ആനുകൂല്യം ലഭിക്കുന്നവര്‍ക്ക് പെന്‍ഷന്‍ വിഹിതം അടയ്ക്കാതെയും പദ്ധതിയില്‍ തുടരാന്‍ സാധിക്കും. പ്രതിവര്‍ഷം ആറായിരം രൂപ കര്‍ഷകര്‍ക്ക് ലഭിക്കുന്നതാണ് പ്രധാനമന്ത്രി കിസാന്‍ സമ്മാന്‍ നിധി. ഇതില്‍ നിന്നും പെന്‍ഷന്‍ വിഹിതം അടഞ്ഞുപോകുന്നവിധവും ക്രമീകരിക്കാവുന്നതാണ്.