ന്യൂഡൽഹി: ഉജ്വല ഗുണഭോക്താക്കൾക്കു ജൂൺ 30 വരെ പാചകവാതക സിലിണ്ടർ സൗജന്യമായി നൽകുമെന്നു കേന്ദ്രം. ഈ മാസം 1.28 കോടി സിലിണ്ടറുകളാണ് ഉജ്വല ഗുണഭോക്താക്കൾ ബുക്ക് ചെയ്തിരിക്കുന്നത്. ഇതിൽ 85 ലക്ഷത്തോളം വിതരണം ചെയ്തു. 

നിര്‍ദ്ധന കുടുംബങ്ങള്‍ക്ക് സൗജന്യ എല്‍പിജി കണക്ഷന്‍ നല്‍കുന്നതാണ് ഉജ്വല യോജന പദ്ധതി. രാജ്യത്ത് 27.87 കോടി എൽപിജി ഉപയോക്താക്കളിൽ 8 കോടിയിൽപരം ആളുകൾ ഉജ്വല ഗുണഭോക്താക്കളാണ്. 

കൊറോണ വൈറസ് മൂലം ലോക്ക്ഡൗൺ പ്രഖ്യാപിച്ച സാഹചര്യത്തിൽ പ്രതിസന്ധി മറികടക്കാനാണ് രാജ്യത്തെ പാവപ്പെട്ട കുടുംബങ്ങള്‍ക്ക് മൂന്ന് മാസത്തേക്ക് പാചകവാതക സിലിണ്ടര്‍ സൗജന്യമായി നല്‍കുമെന്ന് അറിയിച്ചത്. കേന്ദ്രധനമന്ത്രാലയം പ്രഖ്യാപിച്ച പ്രത്യേക സാമ്പത്തിക പാക്കേജിലാണ് ഈ പ്രഖ്യാപനം. നിലവിൽ പ്രതിദിനം 50 – 60 ലക്ഷം സിലണ്ടറുകൾ രാജ്യത്തു വിതരണം ചെയ്യുന്നുണ്ട്.