ലക്‌നൗ: ഉത്തര്‍പ്രദേശില്‍ ആരോഗ്യപ്രവര്‍ത്തകര്‍ക്കും പൊലീസ് ഉദ്യോഗസ്ഥര്‍ക്കുമെതിരെ ആക്രമണം. കോവിഡ് ബാധിച്ച് മരിച്ചയാളുടെ കുടുംബാംഗങ്ങളെ ക്വാറന്റൈന്‍ കേന്ദ്രത്തിലേക്ക് കൊണ്ടുപോകാന്‍ എത്തിയ ഡോക്ടര്‍മാര്‍ ഉള്‍പ്പെടെയുളള മെഡിക്കല്‍ സംഘത്തിനും പൊലീസ് ഉദ്യോഗസ്ഥര്‍ക്കും നേരെയാണ് ചില പ്രദേശവാസികള്‍ ആക്രമണം അഴിച്ചുവിട്ടത്. അക്രമികള്‍ ആരോഗ്യപ്രവര്‍ത്തകര്‍ക്കും പൊലീസ് ഉദ്യോഗസ്ഥര്‍ക്കും നേരെ കല്ലേറിയുന്നതിന്റെ ദൃശ്യങ്ങള്‍ പുറത്തുവന്നു.
ഉത്തര്‍പ്രദേശിലെ മൊറാദാബാദിലാണ് സംഭവം. കഴിഞ്ഞദിവസം മധ്യപ്രദേശിലെ ഇന്‍ഡോറിലും സമാനമായ സംഭവം റിപ്പോര്‍ട്ട് ചെയ്തിരുന്നു. കഴിഞ്ഞ ദിവസം പ്രദേശത്ത് കോവിഡ് ബാധിച്ച് ഒരാള്‍ മരിച്ചിരുന്നു. ഇയാളുടെ കുടുംബാംഗങ്ങളെ ക്വാറന്റൈന്‍ സെന്ററില്‍ എത്തിച്ച് നിരീക്ഷണത്തിലാക്കാണ് മെഡിക്കല്‍ സംഘം സ്ഥലത്തെത്തിയത്. ഇവരെ ആക്രമിക്കാന്‍ ആയിരകണക്കിന് ജനങ്ങള്‍ തെരുവില്‍ ഇറങ്ങിയതായാണ് റിപ്പോര്‍ട്ടുകള്‍.
വീടിന്റെ മുകളില്‍ നിന്ന് ആരോഗ്യപ്രവര്‍ത്തകര്‍ക്കും പൊലീസ് ഉദ്യോഗസ്ഥര്‍ക്കും നേരെ കല്ലേറിയുന്നതിന്റെ ദൃശ്യങ്ങളാണ് പുറത്തുവന്നത്. സംഭവത്തില്‍ ഒരു ഡോക്ടറും ഫാര്‍മസിസ്റ്റും ഉള്‍പ്പെടെ മൂന്ന് പേര്‍ക്ക് പരിക്കേറ്റൂ.പൊലീസ് ജീപ്പിന്റെ ചില്ല് തകര്‍ന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ