പൂട്ടിയിട്ട ഗേറ്റിന് പുറകില്‍ ഭക്ഷണത്തിന് വേണ്ടി തിരക്കുകൂട്ടി ജനം, പിപിഇ കിറ്റ് ധരിച്ച ആള്‍ ഭക്ഷണവും വെള്ളവും എറിഞ്ഞുകൊടുക്കുന്നു. കോവിഡ് 19നെ പ്രതിരോധിക്കുന്ന നടപടികളില്‍ കേന്ദ്രസര്‍ക്കാര്‍ അഭിനന്ദിച്ച ഉത്തര്‍പ്രദേശിലെ ആഗ്രയില്‍ നിന്നുള്ള ദൃശ്യമാണിത്. 

ആളുകളെ കൂട്ടത്തോടെ ക്വാറന്റൈനിലാക്കിയിരിക്കുന്ന ആഗ്ര ഹിന്ദുസ്ഥാന്‍ കോളജിലാണ് സംഭവം നടന്നത്. സ്ഥിരമായി ഇങ്ങനെയാണ് ഭക്ഷണവും വെള്ളവും എത്തിക്കുന്നത് എന്നാണ് ഇവിടെ നിരീക്ഷണത്തിലുള്ളവര്‍ പറയുന്നത്. എന്നാല്‍ ഇത് മുന്‍പ് നടന്നതാണെന്നും ഇപ്പോള്‍ എല്ലാം നേരെയാണ് പോകുന്നത് എന്നുമാണ് ആഗ്ര ജില്ലാ കലക്ടര്‍ പ്രഭു നാരായണ്‍ പറയുന്നത്. വിഷയത്തില്‍ കലക്ടര്‍ അന്വേഷണം പ്രഖ്യാപിച്ചിട്ടുണ്ട്. 

ഞായറാഴ്ച ആഗ്രയില്‍ മാത്രം 372പേര്‍ക്കാണ് കോവിഡ് 19 സ്ഥിരീരരിച്ചത്. 49പേര്‍ക്ക് രോഗം ഭേദമായി. ആഗ്രയില്‍ കോവിഡ് പ്രതിരോധ പ്രവര്‍ത്തനങ്ങള്‍ കൃത്യമായാണ് നടക്കുന്നതെന്ന് നേരത്തെ സംസ്ഥാന സര്‍ക്കാര്‍ അവകാശപ്പെട്ടിരുന്നു. ആഗ്രയില്‍ ഉള്‍പ്പെടെ ഉത്തര്‍പ്രദേശ് സര്‍ക്കാര്‍ സ്വീകരിക്കുന്ന നടപടികളെ കേന്ദ്രസര്‍ക്കാര്‍ പ്രശംസിച്ചിരുന്നു.