ഭോപ്പാല്‍: മധ്യപ്രദേശില്‍ നടുറോഡില്‍ അടിപിടിക്കിടെ ലോറിക്കടിയില്‍പ്പെട്ട് 32കാരന് ദാരുണാന്ത്യം. ആര്‍ക്കിടെക്ട് ആയ യുവാവാണ് കൊല്ലപ്പെട്ടത്. വിവാഹവാര്‍ഷികത്തിന് നാലുദിവസം മാത്രം അവശേഷിക്കേയാണ് ഇന്‍ഡോര്‍ സ്മാര്‍ട്ട് സിറ്റി പ്രോജക്ടില്‍ ജോലി ചെയ്യുന്ന യുവാവ് മരിച്ചത്. 32കാരനെ മര്‍ദ്ദിച്ച യുവാവിനും ലോറി ഡ്രൈവര്‍ക്കുമെതിരെ കുറ്റകരമായ നരഹത്യയ്ക്ക് പൊലീസ് കേസെടുത്തു.
ഇന്‍ഡോര്‍ പലാസിയ മേഖലയിലാണ് സംഭവം. സിദ്ധാര്‍ഥ് സോണിയാണ് മരിച്ചത്. ജോലി സ്ഥലത്തേയ്ക്ക് പോകുന്നതിനിടെ സിദ്ധാര്‍ഥ് സഞ്ചരിച്ചിരുന്ന കാര്‍, അബദ്ധത്തില്‍ വികാസ് യാദവിന്റെ സ്‌കൂട്ടറില്‍ ഇടിച്ചു. കാറില്‍ നിന്ന് പുറത്തിറങ്ങിയ സിദ്ധാര്‍ഥ് വികാസ് യാദവിനോട് ക്ഷമ ചോദിച്ചു. എന്നാല്‍ വികാസ് സിദ്ധാര്‍ഥിനെ അസഭ്യം പറയാന്‍ തുടങ്ങിയതായി റിപ്പോര്‍ട്ടുകള്‍ വ്യക്തമാക്കുന്നു.
ഇത് പിന്നീട് അടിപിടിയില്‍ കലാശിച്ചതായി ദൃശ്യങ്ങള്‍ വ്യക്തമാക്കുന്നു. വികാസിന്റെ മര്‍ദ്ദനമേറ്റ സിദ്ധാര്‍ഥ്, അതുവഴി കടന്നുവന്ന ലോറിക്കടിയില്‍പ്പെട്ടാണ് അപകടം ഉണ്ടായത്. അടിപിടിക്കിടെ, വികാസ് തള്ളിയപ്പോള്‍ നിയന്ത്രണംവിട്ട് സിദ്ധാര്‍ഥ്് ലോറിയുടെ അടിയിലേക്ക് വീഴുകയായിരുന്നുവെന്ന് ദൃശ്യങ്ങള്‍ വ്യക്തമാക്കുന്നു. തത്ക്ഷണം തന്നെ സിദ്ധാര്‍ഥ് മരിച്ചതായി പൊലീസ് പറയുന്നു.
വീഡിയോ കടപ്പാട്: Anurag Dwary
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ