ന്യൂഡല്‍ഹി: ത്രസിപ്പിക്കുന്ന ദൃശ്യങ്ങളുമായി, വേറിട്ട രീതിയില്‍ പുതുവത്സരാശംസകള്‍ നേര്‍ന്ന് ഇന്ത്യയുടെ വ്യോമസേന. രണ്ടു മിനിറ്റിലേറെ ദൈര്‍ഘ്യമുള്ള വീഡിയോയിലൂടെയാണ് വ്യോമസേന പുതുവത്സരാശംസകള്‍ നേര്‍ന്നത്. കഴിഞ്ഞ ദിവസം ട്വിറ്ററിലൂടെയാണ് വീഡിയോ പുറത്തുവിട്ടത്.
സേനയുടെ യൂണിഫോം ധരിച്ച ഓരോരുത്തര്‍ക്കും ആദരമര്‍പ്പിക്കുന്ന വീഡിയോയില്‍ സുഖോയ്-30, റഫാല്‍ യുദ്ധ വിമാനങ്ങളുടെ വ്യോമാഭ്യാസ പ്രകടനങ്ങളും ഉള്‍ക്കൊള്ളിച്ചിരിക്കുന്നു. ചടുലമായ ദൃശ്യങ്ങള്‍ക്ക് ചേര്‍ന്ന പശ്ചാത്തല സംഗീതവും വിവരണവും വീഡിയോയെ കൂടുതല്‍ മികവുറ്റതാക്കുന്നു.
'രാജ്യത്തോടുള്ള സ്‌നേഹം ശത്രുക്കളെ തോല്‍പ്പിക്കുന്നതിലേക്ക് ഭയത്തെ തിരിച്ചുവിട്ടു. രാജ്യത്തിന് വേണ്ടി പോരാടുമ്പോള്‍ കൊടുങ്കാറ്റുകളുടെ തീവ്രത കുറഞ്ഞിരിക്കുന്നു, കാരണം ഞാന്‍ ഒരു ഇന്ത്യന്‍ വ്യോമസേന സൈനികനാണ്. എന്റെ ഒരു കണ്ണ് എല്ലായ്‌പ്പോഴും ആകാശത്തെ ശത്രുക്കളിലാണ്'- വീഡിയോയില്‍ പറയുന്നു.
അതിദുര്‍ഘടമായ മേഖലകളില്‍ പരിശീലനം നടത്തുന്ന സൈനികരുടെ ദൃശ്യങ്ങളും വീഡിയോയില്‍ കാണാം. ഒരു ഇന്ത്യന്‍ വ്യോമസേന സൈനികന്‍ എന്നത് ഒരു തുടക്കമാണ്, ഒരിക്കലും അവസാനമല്ലെന്നും വീഡിയോയുടെ അവസാനം പറയുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ