ന്യൂഡൽഹി: വിവിധ സംസ്ഥാനങ്ങളിലെ 54 നിയമസഭാ മണ്ഡലങ്ങളിലേക്കുള്ള ഉപതെരഞ്ഞെടുപ്പുകളിൽ വോട്ടെടുപ്പ് ഇന്ന്. 11 സംസ്ഥാനങ്ങളിലെ നിയമസഭാ മണ്ഡലങ്ങളിലാണ് തെരഞ്ഞെടുപ്പ് നടക്കുന്നത്. മണിപ്പുരിലെ 2 മണ്ഡലങ്ങളിലും ബിഹാറിലെ വാല്മീകി നഗർ ലോക്സഭാ മണ്ഡലത്തിലും ഈ മാസം ഏഴിനാണ് വോട്ടെടുപ്പ്. വോട്ടെണ്ണൽ 10ന്.  

മധ്യപ്രദേശിൽ 28 സീറ്റുകളിലേക്കും ഗുജറാത്തിൽ എട്ട് സീറ്റുകളിലേക്കും, ഉത്തർപ്രദേശിൽ ഏഴ് സീറ്റിലേക്കുമാണ് തെരഞ്ഞെടുപ്പ്. കർണാടക, ജാർഖണ്ഡ്, മണിപ്പുർ, നാഗാലാൻഡ്, ഒഡീഷ എന്നിവിടങ്ങളിൽ രണ്ട് വീതം സീറ്റുകളിലേക്കാണ് ഇന്ന് തെരഞ്ഞെടുപ്പ് നടക്കുന്നത്. ഛത്തീസ്ഗഡ്, ഹരിയാന, തെലങ്കാന എന്നീ സംസ്ഥാനങ്ങളിലെ ഒരു നിയമസഭാ മണ്ഡലത്തിലും തെരഞ്ഞെടുപ്പുണ്ട്. 

കേരളമടക്കമുള്ള സംസ്ഥാനങ്ങളിലായി ആകെ 63 നിയമസഭാ മണ്ഡലങ്ങളിൽ ഒഴിവുണ്ടെങ്കിലും നിലവിൽ 56 ഇടത്ത് മാത്രമാണ് ഉപതെരഞ്ഞെടുപ്പ് നടക്കുന്നത്.  കേരളം, തമിഴ്നാട്, ബംഗാൾ, അസം എന്നിവിടങ്ങളിലെ 7 സീറ്റുകളിൽ വരുന്ന വർഷം നിയമസഭാ തിരഞ്ഞെടുപ്പ് നടക്കും.