കൊച്ചി : ആന്ധ്രയിലും തെലങ്കാനയിലും ഇന്നു മുതല്‍ അണ്‍ റിസര്‍വ്ഡ് ട്രെയിനുകള്‍ സര്‍വീസ് ആരംഭിക്കും. കോവിഡ് വ്യാപനം കുറയുന്നതിനാല്‍ സര്‍വീസുകള്‍ സാധാരണ നിലയില്‍ ആക്കുന്നതിന്റെ ഭാഗമായാണ് നടപടി. എക്‌സ്പ്രസ് ട്രെയിനുകളുടെ ടിക്കറ്റ് ഇന്നു മുതല്‍ അവിടെ ബുക്കിങ് കൗണ്ടറുകളില്‍ നിന്നും ലഭിക്കും.
അതേസമയം ദക്ഷിണ റെയില്‍വേയ്ക്ക് കീഴില്‍ കേരളത്തിലും തമിഴ്‌നാട്ടിലും നിയന്ത്രണം തുടരുകയാണ്. ഈ സംസ്ഥാനങ്ങളില്‍ എക്‌സ്പ്രസ് ട്രെയിനുകളിലെ റിസര്‍വേഷന്‍ ഒഴിവാക്കാന്‍ നടപടിയായിട്ടില്ല.
സംസ്ഥാനത്ത് മുമ്പ് സര്‍വീസ് നടത്തിയിരുന്ന മിക്ക ട്രെയിനുകളും ഇപ്പോള്‍ സര്‍വീസ് നടത്തുന്നുണ്ട്. എന്നാല്‍ ഇവയില്‍ സാധാരണ ടിക്കറ്റോ സീസണ്‍ ടിക്കറ്റോ ഉപയോഗിച്ച് യാത്ര ചെയ്യാന്‍ അനുമതിയില്ല. ഏതാനും മെമു സര്‍വീസിലും ഗുരുവായൂര്‍-പുനലൂര്‍ എക്‌സ്പ്രസിലുമാണ് സംസ്ഥാനത്ത് അണ്‍ റിസര്‍വ്ഡ് ടിക്കറ്റുകള്‍ നല്‍കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ