ബംഗളൂരു: ബംഗളൂരുവില്‍ പട്ടാപ്പകല്‍ നടുറോഡില്‍ വച്ച് യുവതിയെ കടന്നുപിടിച്ച അക്രമിയെ തിരഞ്ഞ് പൊലീസ്. ഇരുപത്തിരണ്ടുകാരിയായ ബിപിഒ ജീവനക്കാരിക്കു നേരെ ഞായറാഴ്ച രാവിലെയാണ് ആക്രമണമുണ്ടായത്.
നഗരത്തിലെ തിരക്കേറിയ ലാങ്ഫാര്‍ഡ് റോഡിലാണ് അക്രമം നടന്നതെന്ന് പൊലീസ് പറഞ്ഞു. ഫുട്പാത്തിലൂടെ നടന്നുപോവുകയായിരുന്ന യുവതിയെ പിന്നാലെ എത്തിയ ആള്‍ കടന്നുപിടിക്കുകയായിരുന്നു. യുവതിയെ ഇയാള്‍ മര്‍ദിക്കുകയും ചെയ്തു. യുവതി ബഹളം വച്ചതോടെ ആളുകള്‍ ഓടിക്കൂടി. പൊലീസ് എത്തിയപ്പോഴേക്കും ഇയാള്‍ കടന്നുകളഞ്ഞു.
സമീപത്തെ കടകളിലെ സിസിടിവി ദൃശ്യങ്ങള്‍ പരിശോധിച്ചുകൊണ്ടിരിക്കുകയാണെന്ന് പൊലീസ് പറഞ്ഞു. യുവതിയും അക്രമിയും തമ്മില്‍ ഏതെങ്കിലും വിധത്തില്‍ ബന്ധമുണ്ടോയെന്നു പൊലീസ് പരിശോധിക്കുന്നുണ്ട്. യുവതിയെ ഇയാള്‍ മര്‍ദിച്ചതാണ് ഇത്തരമൊരു സംശയത്തിലേക്കു നയിച്ചതെന്ന് പൊലീസ് പറഞ്ഞു.
അക്രമിയെക്കുറിച്ചു വിവരങ്ങള്‍ ലഭിച്ചിട്ടുണ്ടെന്നും ഉടന്‍ പിടിയിലാവുമെന്നും അശോക്‌നഗര്‍ പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ