ന്യൂഡല്‍ഹി: തെക്കന്‍ ആന്‍ഡമാന്‍ കടലിലും നിക്കോബര്‍ ദ്വീപ് സമൂഹങ്ങളിലും തെക്ക് കിഴക്കന്‍ ബംഗാള്‍ ഉള്‍ക്കടലിലും കാലവര്‍ഷം എത്തിച്ചേര്‍ന്നതായി കേന്ദ്ര കാലാവസ്ഥ വകുപ്പ്. തെക്കുപടിഞ്ഞാറന്‍ കാറ്റ് ശക്തമായതിനെ തുടര്‍ന്ന് ആന്‍ഡമാന്‍ നിക്കോബര്‍ ദ്വീപുകളില്‍ മഴ ആരംഭിച്ചു. തെക്കുപടിഞ്ഞാറന്‍ മണ്‍സൂണ്‍ ഇത്തവണ കേരളത്തില്‍ അഞ്ചുദിവസം മുന്‍പെ എത്തുമെന്നും കാലാവസ്ഥ വകുപ്പിന്റെ മുന്നറിയിപ്പില്‍ പറയുന്നു.
രണ്ടുമൂന്ന് ദിവസത്തിനകം തെക്കുപടിഞ്ഞാറന്‍ മണ്‍സൂണ്‍ ആന്‍ഡമാന്‍ നിക്കോബാര്‍ ദ്വീപ് സമൂഹങ്ങളില്‍ മുഴുവനായും കിഴക്ക്- മധ്യ ബംഗാള്‍ ഉള്‍ക്കടലിലും എത്തും. ചുഴലിക്കാറ്റിന്റെ സ്വാധീനഫലമായി ലക്ഷദ്വീപിലും തമിഴ്‌നാടിന്റെ വടക്കന്‍ തീരങ്ങളിലും കേരളത്തിലും കര്‍ണാടകയുടെ തെക്കന്‍ ഭാഗങ്ങളിലും അടുത്ത അഞ്ചുദിവസം മഴ ലഭിക്കുമെന്നും കാലാവസ്ഥ വകുപ്പ് അറിയിച്ചു.
കേരളത്തിലും കര്‍ണാടകയുടെ തെക്കന്‍ ഉള്‍പ്രദേശങ്ങളിലും ഒറ്റപ്പെട്ട അതിതീവ്രമഴയ്ക്ക് സാധ്യതയുള്ളതിനാല്‍ ജാഗ്രത പാലിക്കണമെന്നും മുന്നറിയിപ്പില്‍ പറയുന്നു. തമിഴ്‌നാടിന്റെ വടക്കന്‍ തീരങ്ങളിലും ലക്ഷദ്വീപിലും പരക്കെ മഴയ്ക്ക് സാധ്യതയുണ്ട്. തമിഴ്‌നാട്ടില്‍ വരുന്ന ദിവസങ്ങളില്‍ ഒറ്റപ്പെട്ട ശക്തമായ മഴയ്ക്കും സാധ്യതയുണ്ട്.
തെക്കുപടിഞ്ഞാറന്‍ മണ്‍സൂണ്‍ കേരളത്തില്‍ നേരത്തെ എത്തും. ജൂണ്‍ ഒന്നിനാണ് പതിവായി കാലവര്‍ഷം കേരളത്തില്‍ എത്താറ്. ഇത്തവണ മെയ് 27ന് കാലവര്‍ഷം എത്തിച്ചേരുമെന്ന് പ്രതീക്ഷിക്കുന്നതായും കേന്ദ്ര കാലാവസ്ഥ വകുപ്പ് അറിയിച്ചു.
ഈ വാര്‍ത്ത കൂടി വായിക്കാം
സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ