കൊച്ചി : ഇന്ധന വിലയിലെ കുറവ് തുടരുന്നു. പെട്രോളിന് ഇന്ന് 34 പൈസയും, ഡീസലിന് 38 പൈസയുമാണ് കുറഞ്ഞത്. തുടര്‍ച്ചയായ പത്താം ദിവസമാണ് ഇന്ധന വിലയില്‍ കുറവുണ്ടാകുന്നത്. പത്തുദിവസം കൊണ്ട് പെട്രോളിന് മൂന്ന് രൂപ 85 പൈസയും, ഡീസലിന് നാല് രൂപ 03 പൈസയുമാണ്  കുറഞ്ഞത്. 

കൊച്ചിയില്‍ ഒരു ലിറ്റര്‍ പെട്രോളിന്റെ ഇന്നത്തെ വില 74.43 രൂപയാണ്. ഡീസലിന്റെ വിലയാകട്ടെ 70.95 രൂപയും. തിരുവനന്തപുരത്ത് ഒരു ലിറ്റര്‍ പെട്രോളിന്റെ വില 75.76 രൂപയും, ഡീസലിന്റെ വില 72.31 രൂപയുമാണ്. കോഴിക്കോട് പെട്രോളിനും ഡീസലിനും യഥാക്രമം 74.76 രൂപ, 71.27 രൂപ എന്നിങ്ങനെയാണ്. 

രാജ്യതലസ്ഥാനമായ ഡല്‍ഹിയില്‍ ഒരു ലിറ്റര്‍ പെട്രോളിന് ഇന്നത്തെ പെട്രോള്‍ വില 72.53 രൂപയാണ്. ഡീസലിന് 67.35 രൂപയും. വാണിജ്യതലസ്ഥാനമായ മുംബൈയിലാകട്ടെ പെട്രോള്‍, ഡീസല്‍ വില യഥാക്രമം 78.09 രൂപ, 70.49 രൂപ എന്നിങ്ങനെയാണ്. 

പെട്രോള്‍ ലിറ്ററിന് 75 രൂപയിലെത്തിയതോടെ വില എട്ടുമാസത്തെ താഴ്ന്ന നിലവാരത്തിലേക്കെത്തി. തുടര്‍ച്ചയായി ആറ് ആഴ്ച വില കുറഞ്ഞതോടെയാണ്, കഴിഞ്ഞ ഏപ്രില്‍ മുതലുണ്ടായ വിലക്കയറ്റത്തിന് മുമ്പുള്ള നിലവാരത്തിലേക്ക് പെട്രോള്‍ വില എത്തിയത്.