ന്യൂഡല്‍ഹി: രൂപയുടെ തകര്‍ച്ച തുടരുന്നു.ഡോളറിനെതിരെ 21 പൈസയുടെ നഷ്ടത്തോടെ 74 രൂപ 27 പൈസ എന്ന നിലയിലാണ് രൂപയുടെ വിനിമയം നടക്കുന്നത്. രണ്ടുദിവസം കൊണ്ട് 50 പൈസയുടെ നഷ്ടമാണ് ഇപ്പോള്‍ ഉണ്ടായിരിക്കുന്നത്.കഴിഞ്ഞ വെളളിയാഴ്ച 73 രൂപ 77 പൈസ എന്ന നിലയിലാണ് രൂപയുടെ വിനിമയം അവസാനിച്ചത്. ഇതാണ് ഇപ്പോള്‍ 74 ഉം കടന്നു 75ലേക്ക് കുതിക്കുന്നത്. 

ഡോളര്‍ കരുത്താര്‍ജിക്കുന്നതും ഇന്ത്യന്‍ സമ്പദ് വ്യവസ്ഥയുമായി ബന്ധപ്പെട്ട് രാജ്യാന്തര നാണ്യനിധിയുടെ  അനുമാനവുമാണ് രൂപയില്‍ പ്രതിഫലിച്ചത്. നടപ്പുസാമ്പത്തിക വര്‍ഷം രാജ്യത്തിന്റെ പ്രതീക്ഷിത വളര്‍ച്ചാ നിരക്ക് 7.3 ശതമാനമായി രാജ്യാന്തര നാണ്യനിധി നിലനിര്‍ത്തി. എന്നാല്‍ വരുന്ന സാമ്പത്തിക വര്‍ഷത്തില്‍ മുന്‍ അനുമാനത്ത അപേക്ഷിച്ച് വളര്‍ച്ചാനിരക്ക് കുറയുമെന്നതാണ് ഐഎംഎഫിന്റെ പ്രവചനം. 7.5 ശതമാനത്തില്‍ നിന്ന് 7.4 ശതമാനമായാണ് വെട്ടിച്ചുരുക്കിയത്. 

അതേസമയം രൂപയ്‌ക്കെതിരെ കുവൈറ്റ് ദിനാറിന്റെ മൂല്യവും ഉയര്‍ന്നു. ഒരു കുവൈറ്റ് ദിനാറിന് 244 രൂപ 18 പൈസ നല്‍കണം. 22 പൈസയുടെ നഷ്ടമാണ് രൂപയ്ക്ക് ഉണ്ടായത്. യുഎഇ ദിര്‍ഹവും ഉയര്‍ന്നു. 20 രൂപ 19 പൈസയായാണ് വര്‍ധിച്ചത്. ഇന്നലെ ഇത് 20 രൂപ 17 പൈസയായിരുന്നു.