ന്യൂഡല്‍ഹി:  കോവിഡ് ദുരിതത്തില്‍ കഴിയുന്ന ജനങ്ങള്‍ക്ക് ആശ്വാസമായി പാചകവാതകവില വീണ്ടും കുറഞ്ഞു. സബ്‌സിഡി രഹിത പാചകവാതക സിലിണ്ടറിന്റെ വിലയില്‍ 63 രൂപയുടെ കുറവാണ് ഉണ്ടായിരിക്കുന്നത്. തുടര്‍ച്ചയായ രണ്ടാം മാസമാണ്  ഗാര്‍ഹിക ആവശ്യത്തിനുളള 14.2 കിലോ വരുന്ന പാചകവാതക സിലിണ്ടറിന് വില കുറയുന്നത്. രാജ്യാന്തര വിപണിയില്‍ അസംസ്‌കൃത എണ്ണ വില ഗണ്യമായി താഴ്ന്നതാണ് പാചകവാതക വിലയില്‍ പ്രതിഫലിച്ചത്.

സബ്‌സിഡി രഹിത പാചകവാതക സിലിണ്ടറിന്റെ വിലയില്‍ കുറവ് വരുത്തിയതോടെ, കേരളത്തില്‍ വില 734 രൂപ 50 പൈസയായി. ഡല്‍ഹിയിലും മുംബൈയിലും ചെന്നൈയിലും യഥാക്രമം 744, 714, 761 എന്നിങ്ങനെയാണ്വില. വാണിജ്യ സിലിണ്ടറിന്റെ വിലയിലും കുറവുണ്ടായിട്ടുണ്ട്. 97 രൂപയുടെ കുറവാണ് ഉണ്ടായിരിക്കുന്നത്. രാജ്യാന്തര വിപണിയില്‍ അസംസ്‌കൃത എണ്ണ വില ബാരലിന് 20 ഡോളറില്‍ എത്തി നില്‍ക്കുകയാണ്. ഇതാണ് പാചകവാതക വിലയില്‍ പ്രതിഫലിച്ചത്. 

കഴിഞ്ഞമാസം സബ്‌സിഡിരഹിത പാചക വാതക സിലിണ്ടറിന്റെ വിലയില്‍ 53 രൂപയുടെ കുറവാണ് വരുത്തിയത്. ഇതോടെ രണ്ടുമാസം കൊണ്ട് പാചകവാതക വിലയില്‍ ഉണ്ടായ കുറവ് 116 രൂപയായി. തുടര്‍ച്ചയായി ആറുതവണ പാചകവാതക വില വര്‍ധിച്ചതിന് പിന്നാലെയാണ് കഴിഞ്ഞ മാസം വില കുറഞ്ഞത്.