കൊച്ചി: തുടര്‍ച്ചയായി 17ാം ദിവസവും രാജ്യത്ത് പെട്രോള്‍, ഡീസല്‍ വിലയില്‍ വര്‍ധന. ഇന്ന് പെട്രോളിന് 19 പെസയും ഡീസലിന് 52 പൈസയുമാണ് വര്‍ധിച്ചത്. ഇതോടെ പെട്രോള്‍ വില 81 രൂപ കടന്നു. 17 ദിവസത്തിനിടെ പെട്രോളിന് 8 രൂപ 52 പൈസയും ഡീസലിന് 9 രൂപ 50 പൈസയുമാണ് വില കൂടിയത്.

തിരുവനന്തപുരത്തെ പെട്രോള്‍ വില 81. 49 ആയും ഡീസല്‍ വില 76. 64 ആയുമാണ് വര്‍ധിച്ചത്. കൊച്ചിയില്‍ പെട്രോളിന് 80.69 ഉും ഡീസലിന് 75. 19 മാണ് വില.

ആഗോളതലത്തില്‍ അസംസ്‌കൃത എണ്ണ വില ഇടിയുമ്പോഴാണ് ഇന്ത്യയില്‍ എണ്ണ വിതരണ കമ്പനികള്‍ വില ദിവസേന ഉയര്‍ത്തുന്നത്. രാജ്യാന്തര വിപണിയില്‍ അസംസ്‌കൃത എണ്ണയുടെ വില കുത്തനെ ഇടിഞ്ഞെങ്കിലും സര്‍ക്കാര്‍ എക്‌സൈസ് ഡ്യൂട്ടി മൂന്ന് രൂപ വര്‍ധിപ്പിച്ചതോടെ അതിന്റെ ഗുണം ഉപഭോക്താക്കള്‍ക്കു ലഭിച്ചില്ല. ഇപ്പോള്‍ രാജ്യാന്തര വിപണിയിലെ വില തിരിച്ചു കയറുന്ന പശ്ചാത്തലത്തിലും എണ്ണക്കമ്പനികള്‍ ആഭ്യന്തര വില്‍പ്പന വില ഉയര്‍ത്തുകയാണ്.