കഴിഞ്ഞ സീസണില്‍ നിര്‍ഭാഗ്യത്തിന്റെ പേരില്‍ കല്‍ക്കത്തയോട് മുട്ടുമടക്കേണ്ടി വന്നതിന്റെ കലിപ്പ് ഈ സീസണിലെ ആദ്യ മത്സരത്തില്‍ തന്നെ പുറത്തെടുക്കുമെന്ന ആവേശത്തിലായിരുന്നു മഞ്ഞപ്പട. ആരാധകരുടെ ആവേശം പോരാട്ടവീര്യവും ഉച്ചിയില്‍ നിന്നെങ്കിലും മൈതാനത്ത് ബ്ലാസ്‌റ്റേഴ്‌സ് ഉറങ്ങി. 

തുടര്‍ച്ചയായ രണ്ടാം മത്സരത്തിലും ആരാധകരെ ആവേശത്തിലാഴ്ത്തുന്ന ഒരു നീക്കവും ബ്ലാസ്റ്റേഴ്‌സ് താരങ്ങളുടെ ബൂട്ടില്‍ നിന്നും പിറന്നില്ല. മത്സരം അവസാനിക്കാന്‍ പത്ത് മിനിറ്റ് മാത്രമുള്ളപ്പോള്‍ ജവഹര്‍ലാല്‍ നെഹ്‌റു സ്‌റ്റേഡിയത്തിലെ കാണികള്‍ക്കിടയില്‍ നിന്നും ഉയര്‍ന്ന വീര്‍പ്പുമുട്ടല്‍ വ്യക്തമാക്കുന്നുണ്ട് അവരുടെ പ്രതീക്ഷകള്‍ വലുതായിരുന്നു എന്ന്. 

ബ്ലാസ്റ്റേഴ്‌സ് തിരിച്ചെത്തും എന്ന് തന്നെയാണ് മഞ്ഞപ്പടയുടെ വിശ്വാസം.  രണ്ട് മത്സരങ്ങള്‍ മാത്രമാണ് കഴിഞ്ഞിട്ടുള്ളതെന്നതും, പുതിയ ടീം ഫോര്‍മേഷനില്‍ എത്താന്‍ സമയമെടുക്കുമെന്നും ആരാധകര്‍ തന്നെ ചൂണ്ടിക്കാണിക്കുന്നുണ്ട്. എന്നാല്‍ ആരാധകരുടെ നിരാശ  അവര്‍ സമൂഹമാധ്യമങ്ങളിലൂടെ മറച്ചു വയ്ക്കാതെ തുറന്നു പറയുന്നു.