മെല്‍ബണ്‍: അരങ്ങേറ്റ ടെസ്റ്റില്‍ തന്നെ അര്‍ധസെഞ്ചുറി പ്രകടനവുമായി മായങ്ക് അഗര്‍വാള്‍ പ്രതിഭ തെളിയിച്ചത് ഇതുവരെ ടീമിലെ ഓപ്പണർമാരായിരുന്ന കെ എൽ രാഹുലിനും മുരളി വിജയിനും കനത്ത തിരിച്ചടിയാണ്. ഓസീസ് പരമ്പരയിൽ സമ്പൂർണ പരാജയമായിരുന്ന ഇരുവരെയും മാറ്റി മെൽബണിൽ പുതിയ ഓപ്പണിംഗ് ജോഡിയാണ് ഇന്ത്യൻ ഇന്നിംഗ്സ് തുറക്കാനെത്തിയത്. സഹഓപ്പണർ ഹനുമ വിഹാരി എട്ടുറൺസിന് പുറത്തായെങ്കിലും, മായങ്ക് രാജ്യാന്തര തലത്തിലെ കന്നി അർധ സെഞ്ച്വറിയുമായി ടീമിലെ സ്ഥാനത്തിന് അവകാശം ഉന്നയിച്ചുകഴിഞ്ഞു.
മായങ്ക് അഗർവാൾ മികച്ച കളി കാഴ്ചവെച്ചതോടെ, മോശം ഫോം തുടരുന്ന കെ എൽ രാഹുലിനെ ട്രോളുന്ന തിരക്കിലാണ് ആരാധകർ. മായങ്ക് അഗർവാൾ രാഹുലിന്റെ താടിയില്‍ പിടിക്കുന്ന ഒരു ചിത്രം ഉപയോഗിച്ചാണ് രാഹുലിനെതിരായ ട്രോളുകള്‍ നിറയുന്നത്. നീ ഇനി താടിയില്‍ ശ്രദ്ധിച്ചോളൂ, ഓപ്പണിംഗ് ഇനി ഞാന്‍ നോക്കിക്കൊള്ളാമെന്ന് മായങ്ക്, രാഹുലിനോട് പറയുന്ന രീതിയിലാണ് ട്രോളുകള്‍.
മായങ്കിന്റെ പ്രകടനം കണ്ടിരിക്കുന്ന രാഹുലും വിജയും ഞങ്ങള്‍ നിക്കണോ അതോ പോണോ എന്ന് ചോദിക്കുന്നതാണ് രസകരമായ മറ്റൊരു ട്രോള്‍.
പരിക്കേറ്റ പ്രിഥ്വി ഷാ തിരികെ വരുമ്പോൾ, മായങ്ക് -പ്രിഥ്വി കൂട്ടുകെട്ട് ഇന്ത്യയ്ക്ക് പുതിയ തുടക്കമാകുമെന്നാണ് ആരാധകർ വിലയിരുത്തുന്നത്. മെൽബണിൽ അരങ്ങേറ്റം കുറിച്ച കർണാടകക്കാരനായ മായങ്ക് അഗർവാൾ 78 റൺസെടുത്താണ് പുറത്തായത്. ആഭ്യന്തര ക്രിക്കറ്റില്‍ ഏറെക്കാലമായി സ്ഥിരതയാര്‍ന്ന പ്രകടനം പുറത്തെടുക്കുന്ന മായങ്കിനെ ടീമിൽ എടുക്കണമെന്ന് സുനിൽ ഗവാസ്കർ അടക്കം മുൻതാരങ്ങൾ ഏറെ നാളായി ആവശ്യപ്പെട്ടുവരികയായിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ